Saturday, 1 September 2018

MZP General Hqrs. buatsaihin Hnamdang nupui/pasal neilo tura inzirtirna neih a ni

MZP General Headquarters buatsaihin nimin khan Aizawl Vanapa Hall-ah Hnamdang nupui/pasal neilo tura inzirtirna neih a ni a. He hunah hian MZP President, L. Ramdinliana Renthlei chuan, "Kawppui nupui/pasal atana mahni hnam pui ngei te neih hi ram leh hnam humhalhna kawng pawimawh tak a ni," a ti.

MZP General Hqrs. chuan kumdanga an lo tih tawh \hin angin nimin khan Hnamdang nupui/pasal neilo tura inzirtirna chu Aizawl Vanapa Hall-ah an buatsaih a. He hunah hian MZP General Hqrs. President, L. Ramdinliana Renthlei chuan Mizote chu hnam tlem leh humhalh ngai kan nih avangin ram leh hnam humhalh kawngah thikthu kan tihchhiat telh telh a ngai tih sawiin, "Hnamdang nupui pasal-a neite chu Mizo hnam phatsantu leh ram leilung fate chanvo chuhpui thei a hnamdang siamtute an nih avangin, Mizo zirlaite leh \halaite chu mahni hnam pui te ngei nupui pasal atana nei turin ka sawm che u a ni," a ti a. Mizo Hnam Dan (Mizo Customary Law) Chang 74 Ah chuan 'Mizo mipa-in hnamdang nupui-a a neih chuan Mizo Dan angin engkim a kal \hin. Anmahni inkarah intiamna bik neih pawh lo duh sela, roluah thu leh fate thu-ah Mizo Hnam Dan kalhin a ti thei lo. Mizo hmeichhia in hnamdang pasala a neih chuan hnamdang chhungkuaah a luta ngaih a ni,' tih a inziak tih tawh sawiin, "A awmzia ah chuan Mizo Hmeichhiain hnamdang pasala a neih chuan heng Dan te hi a hman theihloh a, a hmantheihloh bakah an fate kha inti Mizo in Mizo hming pu mahse Mizo niloin Hnamdang anni tho tho a ni. Kan ram leh hnam him nan mahni hnampui ngei kawppui a nei turin zirlaite ka sawm che u a ni," a ti bawk.
MZP huaihawta Hnamdang nupui/pasal neilo tura inzirtirna hi kum 2015 a\ang khan kumtin September 2-ah hman \hin a ni a. Kumin hian Pathianni anih avangin nimin khan hman a ni ta zawk a ni.
Nimin a he hun hman a nih rual hian Zirlaite tan Career Awareness Campaign neih nghal a ni a, Clement Liankunga, IAS (Rtd.), Lt. Col. Clement Lalhmingthanga, LP. Changkima, Chief Manager, SBI leh Laldinpuii Sailo, M.SC Nurshing te chuan zirlai kalkhawmte hmaah thu an sawi bawk.

Latest News

NACO hotu ten Mizoram rawn tlawh mek

Chawlhkar khat chhunga Mizoram District pathum – Aizawl, Lunglei leh Kolasib District-te tlawh kual tura rawn zin National AIDS Control Or...