Mizoram-a DC te SP te intawhkhawmna hun Chief Minister hovin Aizawl-ah neih a ni

Mizoram chhunga District leh Civil Sub-Division inrelbawlna tihchangtlunna tur atana buatsaih, Conference of District Commissioners and Superintendents of Police chu nimin khan Aizawl-a Assembly Annexe Conference Hall-ah neih niin Chief Minister, Lal Thanhawla bakah Home, Finance leh Revenue Minister te pawhin an hmanpui bawk.

Conference of District Commissioners and Superintendents of Police-ah hian Chief Minister, Lal Thanhawla chuan mahni hna a tui leh \hahnemngai tak tak District hotu, Officer naupang tak tak Mizoram in a nei chu lawmawm a tih a sawi a. Mizoram sawrkar chuan District inrelbawlna thuamchak turin kawng hrang hrangah hmalakna a kal mek thu sawiin, mawhphurhna sang zawk inpek pawh \ul a tih thu a sawi a. Hriselna, zirna, inkalpawhna leh miharsate chhawmdawlna lama hmalakna te chu ngaipawimawh lehzual tura a duh thu sawiin Chief Minister chuan, sawrkar scheme te hi mipui tana hriat awlsam leh awlai thei ang bera kalpui \hin nise a ti a. Mizoram chu ruah a sur tam \hin avangin leimin te a tam a, Disaster Management lamah pawh DC leh SP te mawhphurhna a tam \hin thu a sawi bawk. Chief Minister chuan kan hma lawk a inthlan lo awm turah ram hruaitu inthlanna muanawm leh felfai tak a awm theih nan DC leh SP ten theihtawp chhuah a, state dangte tana entawntlak inthlanna kan neih theih nan mahni mawhphurhna \heuh tihlawhtling thei turin duhsakna a hlan bawk.

He hunah hian Home Minister, R. Lalzirliana chuan Mizoram chu state ralmuang leh nuam tak a nih thu sawiin, Mizoram Peace Accord ziah a nih a\anga Vawiin thlenga state leh ram-pum tan a himna hnathawh chhoh a nih dan a sawi a. Border state a nih avanga ram tan a thil pawi thei thil hrang hrang luhka pakhat a nih avanga Police lamin theihtawp a chhuah dan te a sawi a. Thawhhona \ha neih a pawimawh thu sawiin Home Minister chuan, Conference of DCs and SPs chuan Mizoram tan rah \ha a chhuah ngei a beisei thu a sawi bawk.

Finance Minister, Lalsawta pawhin District inrelbawlna fawng chelhtute chu an thawh-puite nen thawhhona \ha an neih pawimawh a tih thu sawiin, tun dinhmun a Mizoram in a mamawh dan ang zela ngaihpawimawh ngai a tih \henkhat a sawi a. District a Department ram \henkhat awm awl te chu \angkai zawka hman an nih theih nan chhinchhiah tura a duh thu te, Right to Public Service Act kenkawhna a DC leh SP ten an mawhphurhna hre reng tura a duh thu te a sawi bawk.

Revenue Minister, R. Romawia pawhin Land Settlement chungchanga DC te mawhphurhna hrang hrang a \obul a\anga sawiin, ram inchuh leh innek sak te awm \hin chu pawi a tih thu leh hetiang harsatna awm \hin te hi sukiang turin Sub-Divisional Officer te hnenah mawhphurhna tam zawk pek \ha a tih thu te a sawi bawk a. DC te chu hmasawnna hna an thawh \hin bakah District hotu ber an nih angin District a Head of Office dangte nen inpawh tak leh inlungrual taka an thawhho \hin a duh thu a sawi bawk.

Mizoram-a DC leh SP te intawhkhawmna hi ni hnih chhung awh tur niin nimin a he hun an hmanna ah hian Chief Secretary, Arvid Ray chuan kalkhawmte lawmna thu sawiin, Ashish Kundra, GAD Commissioner & Secretary chuan Mizo-ram a District Administration leh Civil Sub-Division tihchakna atan hmalak ngaite a sawi a. DC tin ten an hmalakna te an tarlang bawk.

Nimin a he hun hmanna ah hian ramchhung venghimna chungchangte, ILP, Border Issues te, District Magistrate leh Police inkara thawh-hona \ha neih dan tur te, sawrkar laipui programme kalpuinaa DC te mawhphurhna te sawiho a ni a. Vawiin hian Aijal Club Conference Hall-ah chhunzawm leh tur niin Revenue Administration leh Disaster Management chungchang zirho a ni ang.