IAS Probationer mi 23 ten Mizoram CM an kawm

Indian Administrative Service (IAS) 2017 Batch Probationer zinga mi 23 te chuan Mizo-ram rawn tlawhin Inrinni chawhnu khan Chief Minister, Lal Thanhawla chu a chenna Bungalow-ah an kawm.

He an inkawmna ah hian Chief Minister chuan IAS officer rualte chu ram rorelna fawng chelhtu pawimawh tak tak vek an nih dawn avangin khawi hmunah pawh post se an awmna state tan \hahnemngai taka thawk zel tura chah in, hleih nei lova ro an rel zel theih nan mipui rawngbawlna thinlung dik tak pu tura a duh thu a hrilh. IAS Officer training nei mekte hi Chief Minister chuan Mizoram leh Mizote chanchin tlangpui a hrilh a. Mizorama hmasawnna hna kalpui tawh leh thawh mek te sawipuiin, a bik takin \halai te tana eizawnna kawng \ha zawng hawng tura zirna lamah te, infiamna lamah leh thiam thil hrang hrang chher puitlin sak tura hma-lakna te a hrilh a. Mizoram leh India hmarchhak state te chu India ram state dangte aia danglamna a neih avangin hmasawnna hna thawhna ah pawh an post na state an hriatchian a \ul thu a sawi bawk.

Heng IAS 2017 Batch Probationer zinga Mizoram lo kal te hi an vaiin mi 23 an ni a, Chief Minister hnenah hian Mizoram chu nuam an tih thu leh a mi chengten khual thlen thiam an tih thu sawiin, Chief Minister hnenah hian lawmthu an sawi bawk.

Chief Minister kawmtu IAS Probationer te hi AGMUT Cadre mi 6, Assam-Meghalaya Cadre mi 6, Manipur Cadre mi 4, Nagaland Cadre mi 4, Sikkim Cadre 1 leh Tripura Cadre mi 2 an ni a. Zirtawpni khan Mizoram lo thlengin, Inrinni-a Chief Minister an kawm hnu zan lamah IAS Officer zinga Mizoram-a hna chelh mekte nen inkawmna an nei leh bawk a, hetah hian an hnathawhna atana thil pawimawh hrang hrang an sawiho a ni. Heng IAS Probationer te hi Aizawl-a zan hnih an rih hnuah nimin khan Aizawl an chhuahsan leh a ni.