November thla ah inthlanpui neih duh

Mizoram-a Political party hrang hrang aiawhte chuan Election Commission of India aiawha Mizoram-a lo zinte hnenah kumin kumtawp lama Mizoram Assembly inthlanna neih tur chu November thla chhunga neih an duh thu an thlen.

Election Commission of India aiawha Mizoram a tunhnaia rawn zin Deputy Election Commissioner pahnih, Sudip Jain leh Vikram Batra te bakah Director (EVM), Nikhil Kumar te chuan Aizawl Bara Bazar-a Hotel Floria-ah Mizorama Political party hrang hrang aiawhte a mal malin an hmu a, Mizoram Assembly inthlanna neih ni tur atan an duhdan leh a kaihhnawih thildangte an zawt a, hemi hnua party hrang hrang aiawhte sawi danin party aiawhte hian kumin December ni 15-ah tuna sawrkar dinglai term a tawp tawh dawn thu te, December thla tirah Synod inkhawmpui neih a nih dawn thu te, hemi hnuah chuan Mizote hunpui Krismas leh kumthar lawm tura mipuite an buai tawh dawn thu te sawiin, inthlanna chu November thla chhung ngeia zawhfel an duh thu Election Commission aiawhte chu an hrilh a ni.

Hei bakah hian party hrang hrang aiawhte chuan vote thlak ni atan leh vote chhiar ni atan Pathianni leh Inrinni hman loh nise tih te, tlawmngai pawl hrang hrang leh political party hrang hrang thutlukna lo siam tawh angin Tripura Bru Relief Camp 6-a Mizoram mi awmte chu Mizoram ni lo, hmundangah vote thlak tir ni tawh lo se tih leh, Bru Camp-ah Electoral Roll ennawnna pawh neih tawh loh ni se tih chu an duhdan a ni tih an hrilh bawk a ni.

Election Commission aiawha mi pawimawh pathum lo zin te hian District hrang hrang Bawrhsap, District Election Officer ni bawk te kawmin Mizoram Assembly inthlanna neih tur atana inbuatsaih dan tur leh tuna an dinhmun te an zawtfiah a, inthlanna dik, felfai leh muanawm a awm theih nan \ha taka inbuatsaih chho turin an hrilh a ni. Hemi bakah hian inthlanna neih huna boruak \ha leh muanawm tak hnuaia neih theih nan dan leh thupek kenkawh dan tur chungchangte pawh Police hotute an sawipui bawk a ni.