Hmeichhia tan kawng a inhawng zel - Lalsawta

Finance Minister, Lalsawta chuan India ramah hmeichhiate tan politics khawvelah kawng a inhawng chho zel a ni, a ti.

Ni 2 awh tur 'National Seminar on Participation of Women in Governance and Politics at Local and State Level' hawnna inkhawm nimin a Mizoram Assembly Conference Hall-a neih a hmanpuina ah Finance Minister, Lalsawta chuan hmeichhiate hian khawvel ah harsatna tam tak tawk tawhin an awm tih sawiin, India ram-ah Constitution siam danglam anih vangin Municipal Corporation, Local Council leh Village Council level-ah hmeichhiate tan politics khawvelah kawng a inhawng chho zel a ni, a ti a. Mipa leh hmeichhia inthliar hranna (gender biased), mipa chungnung anga ngaihna leh hmeichhe hnuaihnung zawka ngaih tlatna hi khawvela thil la awm reng a ni, a ti bawk. Finance Minister chuan Hmeichhia ten Politics khawvel an zawh dawnin harsatna an tawng tam bik niin a hriat, tih sawiin, Hmeichhia te chawikanga, thlavang hauh tur hian mipate hi a pawimawh zawk kan ni, a ti a. He Seminar thupui chu India ram chauh nilo, Europe leh America-ah te pawh sawiho hlawh tak niin, hmasawn zelna kawngah thil ngaihtuah tur pawimawh tak a ni, a ti bawk. He Seminar hi Prof. C. Lalkima, Chairman, IIPA-MRB chuan kaihruaiin Prof. Lalneihzovi, Secretary, IIPA-MRB chuan Seminar Theme Presentation neiin, tun dinhmunah Local Council-a Hmeichhe thlantlin mi 142 an awm a ni, a ti bawk.