Serchhip-a MHIP Branch hrang hrang ten MHIP Day vawi 44-na uar takin an hmang

Mizo Hmeichhe Insuihkhawm Pawl (MHIP) Day vawi 44-na chu nimin khan Mizoram hmun hrang hrangah uar taka hman a ni a, Serchhip-a MHIP Branch hrang hrangte pawhin he Ni hi urhsun taka hmangin Serchhip District Bawrhsap, Sangchhin Chinzah chuan New Serchhip Venglai leh New Serchhip Bazar Branch ten a huhova an hman chu khuallian niin a hmanpui.

New Serchhip Bazar leh New Serchhip Venglai Branch MHIP te hian MHIP Day vawi 44-na hi New Serchhip YMA Hall-ah a huhova hmangin he hun hi New Serchhip Venglai Branch MHIP President, F. Lalhmunthangi chuan a kaihruai a, he hunah hian District Bawrhsap, Sangchhin Chinzah chuan ‘Mipa hlawhtling phen ah Hmeichhe fel tak an awm \hin’ tih thufing a awm thu sawiin, hei vang hian Hmeichhia te chuan ‘Hmeichhia mai mai’ an ni lo tih an inhriat a pawimawh thu leh Pathian siam danah an ropui thu a sawi a, an ropuina a nasat chuan an mawhphurhna pawh a sang tih hriat a \ul thu sawiin, kan Mizo hnam nun-a thil \halo hrang hrang lo hluar zel siam\ha tur chuan Hmeichhia ten mawhphurhna sang tak an neih thu a sawi a. He huna tel hmeichhia te chu an fate chu an rohlu ber a ni tih hre tura chahin, “Fate kan enkawl hi kan mawhphurhna hmasa ber a ni a, kan ngaih pawimawh hmasak ber tur hi kan hre tur a ni,” tiin fate enkawl leh zirtirna kawngah nu te chu fate tana entawntlak tura an awm a \ul thu a sawi a. ‘Kan Society kan tlakchhiatna hi hmeichhia te mawhphurhna a ni a, Pa te chuan pawn lamah eizawngin hna an thawk a, Hmeichhia te hian kan mawhphurhna hlen turin keimahni inen-a kan insiam\hat a \ul a ni,” a ti bawk.

He hunah hian Vaihlo leh a kaihhnawih chungchang zirhona neih niin Branch pahnih te report ngaihthlak a nih bakah kum kalta chhunga an member boral te sunna hun hman a ni a, chawhnu lamah intihhlimna chi hrang hrang neiin nilengin hun an hmang a ni.

New Serchhip North Branch pawhin MHIP Day hi New Serchhip North Branch YMA Hall-ah hmangin Serchhip Forest-a RO, R. Rochhuma chuan khuallian niin a hmanpui a. He hun hi an President, Lalhruaitluangi chuan kai-hruaiin  khuallian, R. Rochhuma, RO Forest chuan he huna tel te chu MHIP Day Chibai bukin tunlai khawvel chu ‘|halaite khawvel’ tih a nih bakah ‘Hmeichhia te khawvel’ a ni tawh tih sawiin, Hmeichhia te thu leh hla chu mipa te pawhin an zawm \hin avangin hmeichhia te pawimawhna a zual zel tih a sawi a. MHIP Branch hrang hrang ten MHIP Day puala thing\iak an phun leh thing phun sa enkawl hna an thawk chu lawmawm a tih thu pawh sawiin, hei hian kan ram tan rah \ha a chhuah ngei a beisei thu a sawi bawk.

MHIP Day vawi 44-na hi Serchhip-a MHIP Branch tam ber te chuan hnatlang neiin Vantlang tana thil \ha tihna hun atan an hmang a, hriat theih chinah IOC Veng Branch MHIP te chuan khawlai thenfai hnatlang neiin Serchhip damdawi In-ah |hutthleng pakhat pein damlo an kan bakah an huamchhunga dawr hrang hrangah Gutkha products, Sikhaar dapchhuah hna an thawk a. Serchhip Kawnpui Branch MHIP te chuan Serchhip Indoor Stadium leh a chhehvel thenfai hnatlang neiin chawhnu lamah intihhlimna an neih bakah ruai an kilho nghal a, Serchhip Indoor Stadium hmangtu te zingah hmun remchang lai laia bawlhhlawh paih mai \hin an awm chu \halo an tih thu sawiin, helai hmun hmangtu te chuan a hmun takah bawlhhlawh paih \hin se an duh thu an sawi bawk.

Serchhip Field Veng, Dinthar, Chhim Veng, Saron leh Bukpui Branch MHIP te chuan MHIP Day-ah hian hnatlang neiin hun an hmang a, Serchhip P&E Veng Branch te chuan District Jail-a tang mek te nen MHIP Day pual hian inkhawm an nei a. Serchhip Chanmari Branch MHIP te chuan nileng-a hun hmangin thusawi hrang hrang an ngaihthlak bakah tlai lamah ruai an kilho nghal bawk.