Naupang pawngsual leh khuaikhem laka dona beihpui hawnna Minister hova neih a ni

World Vision India leh Mizoram State Child Protection Society \angkawp buatsaih, naupang pawngsual leh khuaikhem laka dona beihpui hawnna chu nimin khan neih a ni.
World Vision India leh Mizoram State Child Protection Society buatsaih naupang pawngsual leh khuaikhem laka dona beihpui, 'It takes Mizoram To End Child Sexual Abuse campaign' tia vuah hawnna hi Law & Judicial Minister, Lalsawta chuan hmanpuiin naupang pawisawilo laka kutthlak, pawngsual leh khuaikhem chu tih tak zeta kan do a \ul thu a sawi a. Sawrkar Department leh Police lam ringawt ni lovin NGO leh mipuite nen kan thawhho a ngai a ni, a ti a. “Naupang khuaikhem chungchangah a tuartu chuan midang hriat a hlauh bakah chhungten kan zep pui a, sawi chhuah a ni lo \hin a ni,” tiin hei hian anmahni khawihtute chu a ti ngampa zual \hin a ni, a ti a. “Court-a kal ai chuan inngaihdam mai kan chingte hian naupang khuaikhem a tihluar a, Mizo mipuiten naupang pawngsual tawk an tam sawt zia kan hriat tlan a ngai a ni,” a ti bawk.
World Vision India hi \anpui ngaite \anpuitu leh naupangte himna kawnga thawktu niin kum 1951 khan din a ni a, Campaign hi state 25 leh UT 1 huamchhunga khawpui leh thingtlang khua 7000-ah naupang maktaduai 10 himna turin kalpui tum a ni a, kum 2021 hmain rampum huapa tuamchhuah tum a ni. Naupang khuaikhem \hat lohzia leh pawi theihzia hria a, an tana aw chhuah a nih theih nan World Vision chuan kil hrang hrang a\angin campaign a kalpui a. Campaign tum zinga langsar tak chu sualna do kawnga mipui tih theih, hmachhawn dan tur te, hmalak dan tur te leh tuartute chhawmdawl dan tur te a ni.
World Vision report in a tarlan dan chuan India ram puma naupang pawngsual tawk zat percentage hi kum 2014-2015 khan 67.5% niin kum 2015-2016 khan 82%-ah a pungchho a. The Protection of Children from Sexual Offences (POCSO) case registered hi kum 2015 khan 10,854 niin kum 2016 khan 36,022-ah a pung bawk a. Mizoram-ah chuan naupang khawih/pawngsual/kutthlak vanga case neih zat hi kum 2014-ah 178, kum 2015-ah 186 leh kum 2016-ah 188 a ni a, Child Welfare Committee (CWC)-a Sexual Abuse Case pawh kum 2015-2016 chhungin 111 awmin, kum 2016-2017 chhungin 116 a awm a, kum 2017-2018 chhungin 164 leh kumin April a\anga June chhungin 29 a awm a. Juvenile Justice Board (JJB) Case pawh kum 2015 a\angin kumin June thlengin 106 a awm bawk a ni.

Popular posts from this blog

PAN CARD an tih teh fo hi - Laldinpuia