Tuikuk hruaikir tura inremna ah NGO te lawmin Inthlan kaihhnawih State pawn-ah kalpui an rem ti lo

Mizoram NGO Coordination Committee chuan Tripura Transit Camp-a awm Tuikuk-te hruaikir tura inremna siam a ni chu lawmawm an tih thu an sawi a. Inthlan kaihhnawih thil reng reng erawh chu Mizoram pawna kalpui a remti ngai dawn lo tih an sawi thung.

Nimin chawhnu dar 1:00 khan YMA, MUP, MHIP, MZP leh MSU telna, NGO Co-Ordination Committee chu Aizawl-a Central YMA Committee Room-ah \hukhawmin Bru laklet chungchang hi an ngaihtuah a. He Meeting kaihruaitu NGO Co-Ordination Committee Chairman leh Central YMA President, Vanlalruata chuan NGO anga Tuikuk laklet chungchang an buaipu tawh \hin dan sawiin, Vawiin thlengin NGO Co-Ordination Committee ngaihdan chu a la ngai reng tih a sawi a. NGO Co-Ordination Committee chuan Election Commission of India-a Chief Election Commissioner (CEC), OP. Rawat chu May ni 29 khan New Delhi-a a Office-ah an hmuh tawh thu sawiin ,CEC hnenah hian Memorandum thehlutin Mizoram NGO te chuan Bru chungchang an buaipui rei tawh thu leh tun bak chu Election Commission lam pawh dawr tura an kal dawn tawh loh thu te, State pawna vote an thlak an remtih dawn tawh loh thu leh state pawna vote an thlak leh chuan nasa taka an dodal tur thu te an thlen tawh thu a sawi.

Nimin a NGO Co-Ordination Committee \hukhawm chuan July 2, 2018-a Sawrkar laipui, Mizoram Sawrkar, Tripura Sawrkar leh Mizoram Bru Displaced People Forum (MBDPF) ten inremna neia, Tripura Transit Camp-a awm Tuikuk-te Mizoram-a an awmna hmun \heuha lo let tura ti chu \ha an tih thu an sawi a. Mizoram khua leh tui dik tak, kum 1995 Electoral Roll-a chuangte leh an thlah kal zel, Tripura Transit Camp-a awm mek ten Mizoram a let duh tak takna rilru pu a, Sawrkar nena ruahmanna \ha tak siam a ni thei ta chu lawmawm an tih thu sawiin, inremna ang ngeia an lo let pawh an beisei thu an sawi.

Hei bakah hian inremna anga an lo let fel hnuah Tripura-a Tuikuk Transit Camp khar hlen tura ruahmanna awm pawh chu NGO Co-Ordination Committee chuan lawmawm an tih thu sawiin, Sawrkar ruahmannate thlawp tlat turin Mizo mipuite pawh a beisei tih an sawi a. Hetih rual hian NGO Co-Ordination Committee chuan inthlan kaihhnawih thil reng reng erawh chu Mizoram pawna kalpui a remti ngai dawn lo tih an sawi thung.