MTA-in State pawn Tipper-te nimin atangin Mizoram-ah hnathawh phallo

Mizoram Tipper Association chuan an lo sawilawk tawh angin nimin, July 1, 2018 a\ang khan state pawn a\anga hnamdang Tipper-ten Balu leh Brick an rawn phurhluh \hin chu an remti tawh lova, Mizoram a\anga Balu phurchhuak \hinte pawh an titawp dawn tih an sawi. DTO-te chu State pawnlam mi lirthei neite registration tihsak tawh lo turin an ngen tih an sawi bawk.

Hemi chungchangah hian Zirtawpni khan Mizoram Tipper Association (MTA) hruaitute chuan Kolasib MJA Press Club-ah chanchinbu mite an kawm a, he hunah hian Kolasib District MTA President, F. Lalbiakliana chuan an pawl Gen. Headquarters in a lo rel tawh angin state pawn lam mi drivers te tan Mizoram chhunga balu phurh an remtih loh thu leh Mizoram chhunga an hralhchhuah ve an phal tawh dawn lo tih a sawi. "State pawna drivers te hi vawi duai lo kan ngen tawh a, kan ngenna min ngaih pawimawh sak lo te chuan harsatna an tawk a nih pawhin anmahni chochhuahah kan ngai ang," tiin a sawi.

MTA Gen. Hqrs. President, C. Lalzarmawia pawhin State pawna Mizo Tipper, balu leh brick phurtuten harsatna an tawk tawh \hin niin a sawi a, tualchhunga mite aia Rs. 200 vela sang lo chuan Mizo Tipper ten an lei ve thei ngai lo chu an lungawiloh thu a sawi a. Kolasib MTA Office-ah nikum balu tlawm lai khan Bagha leh a chhehvela mahalder-te nen Joint Meeting neiin balu metre khatah Rs. 750/- in inremna siam a ni a, mahse an inremna chuan awmzia nei lo in a man sang bawkin Mizo te an lei tir leh tih sawiin, "Mizo Tipper te hian a man tova an phurh chuan hralhna an nei lo anga, anni lamin Mizo te an nek ral ang tih ngaihdan an kalpui niin kan ngai," tiin C. Lalzarmawia chuan a sawi bawk. MTA hruaitute chuan Mizoram-ah balu a awm \ha tawk tih sawiin, tuna an hmalakna turah mi \henkhatin harsatna an lo tawk a nih chuan an hriatthiamna an ngen tih an sawi a, hetihlai hian leilet vela hnamdang chhawrtuten an vai chhawrte, balu leh sumdawnna dang khawihtir lo turin an ngen nghal bawk.

Lirthei registration chungchang pawh sawiin C. Lalzarmawia chuan, lirthei register dawnah a neitu awmnaa register tur a nih laiin state pawna miten Mizoram-ah registration an ti thei chu mak a tih thu a sawi a, "Mizorama miten registration an tih dawnin garage an neih leh neih loh en a ni \hin a, hnamdangte chu ensak an ni ngai lo," a ti bawk. MTA hian Aizawl DTO hnenah State pawn lam mi te Tipper 16 chu registration cancel turin an thlen a, Kolasib-ah pawh state pawn lam mi Tipper 21 a awm nia an hriatthu an sawi bawk.