Mizoram sawrkar intiamna a hlawhtlin loh avangin MZP in Vehbur khawn an tum thu an sawi

Bairabi Zophai-a Assam Police ten Mizo zirlaite bungrua an tihchhiatsak rul tura Mizoram sawrkar intiamna a hlawhtlin loh avangin MZP chuan Mizoram chhunga company lian leh Assam mi leh sa, Mizoram a awmte hnenah an thiam dan ang anga vehbur khawn an tum tih an sawi.

MZP President, L.Ramdinliana Renthlei chuan Inrinni khan Aizawl-a MZP Pisapui ah thuthar thehdarhtute kawmin kumin March ni 10-a Zophai hmuna Assam Police te’n zirlai tlanchhiate umzuiin an riahna Buk-a Mutbu, Pawisa, Thawmhnaw, Bungbel, Cell Phone leh Document pawimawh tak tak awmna te, Zofate Chawlhbuk sa tura mi tlawmngai thawkchhuakte Motor tihchhiat leh Bungraw \henkhat halral a nih thu a sawi a. Heng an halral leh tihchhiat zawng zawngte hlut zawng hi MZP te chhut theih chinah Rs. 21,70,300/- a nih thu a sawi.

MZP President chuan Mizoram sawrkar hotuten thilbo leh chhia zawng zawngte hlutna chhutchhuak a, pek a harsat loh tur thu an sawi avangin damlo te awmna Bill leh Motor chhiate chu a ba thlau a siam tir lehin khulh chhuah a ni tih a sawi a. Thlamuang taka an awm laiin tun thla ni 19 khan sawrkar hnen a\anga lehkha an dawn-ah Zophai buaina chungchanga thilbo, chhia leh damlo te senso zawng zawng tum sak tura an intiamna chu hlen lovin, pawisa a neih loh thu-a an chhang ta mai chu zirlaite hmuhsitna-na nia an ngaih thu a sawi a. Mizoram sawrkarin tun dinhmuna pawisa an neihloh thu \awngka pawh nilo, thu dengkhawng tak hmanga lehkhaa MZP hruaitute a chhang chu Zirlaite hmuhsitna leh ram leh hnam tana thisen lo chhuah tawhna te chu engah mah a ngailo tihnaah MZP chuan a ngaih avangin, MZP Executive Meeting chuan vehbur khawn mai ni se an ti ta tih a sawi a. A \ul angin Mizo mipuite hnenah Vehbur khawn bawk nise tiin a rel a, Mizo mipuiten ram tana fehchhuak thil bo, tihchhiat leh hliam tuarte enkawlna senso rulhna tur thawh ve turin an ngen tih a sawi bawk.

MZP President chuan Bairabi Zophai hmuna Zofate Chawlhbuk sak tumna chu an la \hulh lo tih sawiin ramri chungchanga Chief Minister kaihhruaina hnuaia Committee sang, Core Committee thu leh hla an la ngaichang tih a sawi a, Core Committee te hmalakna leh an thu in awmzia a nei lo a nih chuan MZP chuan nasa leh zualin ramri chungchangah hma a la chhunzawm leh nghal dawn tih a sawi bawk.