Tripura Relief Camp-ah Electoral Roll enfiah hna thawk turin ECI in Mizoram sawrkar a rawn hriattir

Election Commission of India chuan July 31 a\anga Mizoram-a Electoral Roll ennawn hna kalpui leh turah  Tripura Relief Camp paruk (6)-a awmte chu telh ve turin Mizoram sawrkar hnenah a rawn hriattir a. Hei hi Mizorama tlawmngai pawl hrang hrangte chuan an duhloh thu an lo sawi tawh a ni.

Tunhnai khan Election Commission of India chuan hriattirna tichhuakin kumin atana a vawihnihna atan Mizoram-a Electoral Roll hman mek chu ennawna (Special Summary Revision of Electoral Roll) nei turin a rawn hriattir a, hemi atan hian inbuatsaihna pawh kalpui mek a ni a. Hetihlai hian Home Department a\anga thudawn danin Election Commission hian tun \uma Electoral Roll Special Summary Revision neih turah hian Bru Relief Camp paruk (6)-ah hian Relief Camp a kal chilha Electoral Roll ennawn hna hi thawk turin hriattirna a chhuah a. Mizoram sawrkar chu Election Commission duhdan tipuitling turin a hriattir bawk a. Hemi chungchangah hian sawrkar chuan Election Commission thu hi a zawm ngei a ngai dawn niin Home Department hotute chuan an sawi a. A \ul angin ruahmanna pawh siam chhoh a nih tur thu an sawi bawk.

Hetianga Election Commission in a rawn hriattir lai hian Central YMA President, Vanlalruata chuan Mizoram-a tlawmngai pawl hrang hrangte intelkhawmna, NGO Coordination Committee chuan Election Commission hriattirna hi a thuphunga an dodal thu a sawi a. Tunhnaiah Election Commission hotute leh Home Ministry hotute pawh hemi chungchang ah hian an zuk dawr tawh thu a sawi a. Chutah pawh chuan Mizo mipui duhdan chu chiang taka an hrilh hriat thu a sawi a. Tuna thupek thar chungchang hi chu Committee in an la ngaihtuah a rin thu leh thu-tlukna an la siam thuai a rin thu a sawi bawk.

Hetihlai vek hian Tripura Relief Camp a Bru awmte laklet hna thawh tur hi ruahmanna awm mahse kalpui hleih theih a nih loh thu dawn a ni a. Mizoram mi diktak te hi enfiah vek tawh a ni chungin Mizoram a kir duha rawn penchhuak an la awm loh avangin laklet hna hi kalpui theih a nih rih loh thu Home Department thuneitute chuan an sawi bawk.