Naupang kut dawh tirtu Champhai-ah man

Tunhnaia Champhai khawpui chhunga naupang pahnih leh mitdel pahnih te kut dawh tirtu a puh Suresh Kumar Chakma chu Champhai-ah man a ni.
Thudawn danin tunhnai khan naupang pahnih leh mitdel pahnih te chu Champhai khawpui chhungah vakin kut an dawh a. Naupang kutdawh tir hi naupang pual bil dan 'The Juvenile Justice (Care and Protection of Children) Act 2015' in a khap tlat avangin he mite chungchang hi District Child Protection Unit (DCPU), Champhai leh Child Welfare Committee (CWC) Champhai District leh Champhai Police te \angkawp chuan hmalain chhuizuina a nei a. Chhuizelna ah heng mitdel te hi Lawngtlai a\anga lo kal niin, Champhaia Hotel pakhatah an thleng a, Champhai mai ni lo Aizawl, Lawngtlai, Siaha, Lunglei, Serchhip leh Mamit-ah te naupang nena kutdawhin kum 2013 a\ang khan hun an lo hmang tawh tih hriat a ni.
Heng naupang kutdawh te an kalna leh an kutdawhnaa ruahmanna lo siam puitu ber leh hruai kualtu nia hriat, Suresh Kumar Chakma nia insawi chu man a ni a, amah hi kum 29-a upa niin Longpuighat/Vaseikai, Lawngtlai District khua nia inchhal a ni. Suresh Kumar Chakma hian hming lem dang ‘Biakmawia’, ‘Robert-a’ leh ‘Lalmuanpuia’ tih te pawhin alo in chhal \hin bawk. Suresh Kumar Chakma hian an kutdawhna pawisa a\ang hian hlawh a lo nei ve \hin nia sawi niin Suresh Kumar Chakma lakah hian CWC Champhai chuan Section 76 of JJAct thlawh chhanin Champhai Police Station-ah FIR an thehlut a, Police te chuan manin tun thla ni 4 khan Champhai District Jail-ah dahluh nghal a ni.
Juvenile Justice (Care and Protection of Children), Act 2015 Section 76-na chuan kut dawh tura naupang chhawr hi khapin naupang Kutdawh tura chhawrtu emaw, kutdawhtirtu emaw, kut dawh tura titu chu kum nga (5) thleng tantir bakah cheng nuai khat chawitir tur a ni a. Kutdawhna khura hruailuh duh avanga an (naupang) taksa peng engemaw ber tihchhiat sak emaw, ramtuileilo emaw-a siam a nih chuan chutiang tawrhtirtu chu hreahawm taka kum sarih (7) a\anga kum sawm (10) inkar tantir bakah cheng nuai nga (5) chawitira hrem tur a ni a. Naupang enkawltu emaw, naupang chunga thuneitu, pawikhawihna puibawmtu chu pawikhawihtu pangngai ang chiaha hremna pek tur a ni bawk.

Popular News

PAN CARD an tih teh fo hi - Laldinpuia

YMA Day pual Article :