Pangzawl leh Rawpui inkar-a Bus chesual ah mi 11 in nunna chanin hliam tuar engemaw zat an awm

Nizan hmasa dar 12:15 vel khan Aizawl a\anga Siaha pana tlan Night Bus pakhat chu Pangzawl leh Rawpui inkarah chesualin hriat theih chinah mi 11 in nunna an chan a. Hliam tuar mi engemaw zat damdawi In-ah enkawl an la ni bawk a. DM&R Minister, C. Ngunlianchunga chuan nimin vek khan vanduaina thlenna leh hliam tuar te hi a tlawh nghal.

Thudawn danin he Night Bus (Colney Travels) MZ 01/N-2464, R.Zasanga, New Siaha ami ta hian niminpiah tlai khan Aizawl a\anga Siaha panin he Motor ah hian a khalhtu nen mi 29 an chuang a, Rawpui leh Pangzawl inkar, Pangzawl luh hma KM 2 velah kawng kual chhuak fel chiahin Bus hian Black Top chin bak feet khat vel lei pangngai a rap a, he a lei rahna lai hi Telephone hrui phumna, chhilh \hat leh mumal loh feet khat vel dawna thuka rah luh theih; lei nem lo niin lei khuar an rah lai hian Bus hi kawng thlang lamah a tlu ta nia sawi a ni. Motor hi kawngthlang meter 120 vela thui a lum a, Passenger mahnia vakchhuak thei pali (4) vel awmin chung vakchhuak theite chu Pangzawl-ah hian an va zualko a, zan khawthim hnuaiah Pangzawl khua hian chhanchhuah leh chhawmdawl hna thawkin an buai zui nghal a, hriat theih chinah Bus-a chuang mi 30 zingah mi 9 chu a hmunah boral in a hnu, nimin chhun khan midang pahnih chu Serchhip damdawi In-ah a boral leh a, an vaiin mi 11 boralin hliam hi Hnahthial Damdawi In-ah 11 leh Serchhip damdawi In-ah 4 enkawl mek an ni a, hliam zingah hian ngaihtuahawm lutuk an awmlo thung.

He vanduaina thlenga nunna chan te hi he Motor khalhtu TBC. Lalringzela (34), New Siaha East; Thankimi (44) leh a fanu |harihnemi (15), New Siaha; Anita leh a fanu Khusi, Siaha te; Lalropuia, Buhchangphai; Micky-a s/o Thanseia, Council Veng, Siaha; Lalrinpuii, Siahatlah-II; H. Lalrokunga, Bungkawn Vengthar, Aizawl, Norothanga (58), Zemabawk leh Mongolisingh, Siaha te an ni.

Disaster Management & Rehabilitation Minister, C. Ngunlianchunga chuan vanduaina thlen thu hi a hriat velah Aizawl a\anga Serchhip rawn pan nghalin nimin chawhma lamah khan he vanduaina thlenga hliam tuar Serchhip damdawi In-a awm mek mi 6 te chu tlawhin inenkawl-na atan Rs. 1000 \heuh a hlan a, District Hospital-ah hian District Medical Superintendent Dr. ZD Lalmuanawma, Dr. Laldawngliana Sailo, CMO leh R. Sanghmingthanga, President, Sub-Hqrs. YMA ten lo dawngsawng a ni.

Hemi hnu hian Minister hian chetsualna thlenna hmun, Pangzawl lam pan nghalin vanduaina thlenna hmun a enfiah a, Khuanghlum Community Hall-a Pangzawl khawtlangin chetsualnaa boralte ruang an dahna hmun tlawhin niminpiah tlai lama Lunglei Lunglawn-a leimin vanga chhiatna thleng te, Pangzawl daia lirthei chet-sualna thlengte chu Zoram tan chanchin lungchhiat thlak tak nia a hriat thu a sawi a. DM&R changtu Minister a nihna angin nitin Pathian hnenah Mizorama chhiatna rapthlak a thlen lohna tura a dil \hin thu sawiin, chutih laiin mihringte chu Pathian remruatna hnuaia awm vek kan nih zia a lo lang chiang leh \hin nia a hriat thu a sawi a. Mizoram sawrkar chuan heng chhiatna avanga nunna chante, hliam tuarte a tawrhpui tak zet tih a sawi bawk.

Minister chuan Mizoram-a lirthei khalhtu zawng zawngte chu midang nunna vawngtu an nih avanga fimkhur nawn fo tura chahin, Pangzawl khaw mipui ten tlaivar \haka hliam leh ruangte an buaipui hnua fel tak leh mawi taka an lo tuam-hlawm vek chu fakawm a tih thu leh khaw entawn tlak tak nia a hriat thu a sawi a. A \ulna apianga hman turin Pangzawl khawtlang hi Rs. 10,000 a hlan nghal a, a ruahman puina in ruang phurh chhuah dan siamfel nghal a ni a. Lawngtlai leh Saiha lama ruang kal turte Colney Travel Bus pakhatin a ruala phurh phei an ni a, hmun danga kalpui turte pawh Colney Travel Sumo hrang hranga phurh an ni bawk.