Mizoram PWD in Permanent Bridge an dawh zinga sei ber tur Bairabi Tlawng Lei CM in a hawng

Mizoram chhunga Permanent Bridge PWD in a dawh tawh zinga sei ber leh Mizoram-a Lei sei ber dawttu, Bairabi Tlawng Lei (Pre-Stressed Concrete Bridge), NEC 10th Plan Scheme a\anga dawh chu niminpiah khan Chief Minister, Lal Thanhawla chuan a hawng.

Cheng nuai 1413.03 senga dawh Bairabi Tlawng Lei dawh thar hawnna inkhawm ah hian Chief Minister, Lal Thanhawla chuan Mamit leh Kolasib District te inkalpawhna pawimawh tak Lei thar hawn a ni chu lawmawm a tih thu sawiin, Mamit District tan chakkhai hrang hrang lakluhna leh thil thar hralhchhuahna kawng zau takin a inhawn phah dawn thu te, Kolasib District leh Bairabi chu Mizoram chhuah-ka pawimawh an nihna belhchhahtu a nih tur thu te a sawi a. Rel kawng lian nen a inthlunzawm tawh bawk avanga hun reilote ah Bairabi chuan hmasawnna nasa zawk an la hmuh tur thu a sawi a. Chutihrual chuan Bairabi mipuite leh Lei hmang \angkaitu zawng zawngten enkawltu leh neitu rilru pu reng turin a chah bawk.

He hunah hian PWD Minister, Lal Thanzara chuan nimin lawka Tut Lei \ha tak hawn a nih hnua RCC Lei \ha tak mai Bairabi-ah hawn leh theih a ni chu lawmawm a tih thu sawiin, hengte hi Mizoram PWD tana hlawhtlinna ni mai lovin Kolasib District leh Mamit District pumpui tan malsawmna a nih thu a sawi a. Bairabi Ieh a chhehvela hmalak tur hrang hrang PWD Minister chuan a tarlang bawk a. Bairabi - Zamuang Road chu kumin 2018-2019 chhunga NABARD hnuaia siam\hat turin cheng vbc. 43 ruahmanna thehluh tawh a nih thu leh heti chung hian tuna kawng chhuat hi Fur laia a hlauhawm avangin kawng chei nan kumin 2018-19 hian NEDP hnuaiah cheng nuai 200 dah a nih tel thu te; Mamit - Bairabi Road pawh kumin 2018-19 chhunga chei nan cheng nuai 350 chu NEDP hnuaiah dah a nih thu te a sawi bawk.

Bairabi Tlawng Lei hi Ministry of DoNER hnuaia NEC fund a dawh niin, Central sawrkar in zaa 90 tumin State sawrkar in zaa 10 a tum a. Lei hi metre 7.50 a zau, meter 160 (525ft.) a sei niin, footpath metre 1.50 a zau Lei sir tawn tawnah siam a ni bawk. Lei in a dawl zawh chin (load capacity) chu 70R niin, hei hi Indian Road Congress standard a load sang ber a ni. ABCI Infrastructure Private Limited chu he Lei sakna contract pek an niin, June ni 28, 2008 khan bul an \an a, harsatna hrang hrang an tawh hnuah December, 2017 khan Load Test neih theih a ni a, January ni 31, 2018 khan peihfel a ni ta a ni.