Saturday, 7 April 2018

Aizawl-ah Mizoram Economic Conclave neih a ni

Ei leh bara Mizoram in hma a sawn theihnan a kawng hrang hranga sawrkar leh mimal leh pawla anga mawhphurhna fawng vuantute intawhkhawmna runpui, Mizoram Economic Conclave chu Mizorama a vawikhatna atan nimin Aizawl-ah neih a ni.
Mizoram Economic Conclave hi Chief Minister, Lal Thanhawla chuan Assembly House Annexe Conference Hall-ah hawngin Conclave chu ramin hma a sawn theih nana mi \hahnemngai kalkhawm ten an ngaihdan inhrilhtawn a an sawihona hun a nih angin ram tan hlawkthlak hle tura a beisei thu a sawi a. Ram ei leh bar, economy hmasawnna chu thui takin sawrkar na \ha, Good Governance-ah a innghah thu Chief Minister chuan sawiin, tun dinhmunah state dangte leh India ram pum huap pawhin Mizoram chu GSDP leh Per Capita Income-ah te a \hang chak pawl leh a sang pawl a ni chho ta zel chuan sawrkarah thawktu \ha leh \hahnemngai tam tak an awm zia a tilang a ni, a ti a. Sawrkar hna piah lamah Private Sector-ah pawh Mizoramin hmasawn theihna tam tak a neih zia puanzar a \ul thu leh, chumi atan chuan state pawnah tunhnai lawka “Magnetic Mizoram Roadshow” te lo buatsaih a lo nih tawh thu te a tarlang a. Chumi zarah chuan ram dang investor company ten Solar Energy, nizung hmanga kawlphetha siamchhuak tura Mizoram chu thawh dunpui atan tunhnai maia an rawn dawr thu leh, thawhdunna thuthlung buaipui mek a nih thu te Chief Minister hian a sawi bawk.
He hunah hian Finance Minister, Lalsawta pawhin he huna sawrkar department a\angin leh mi taima leh a ngaihna hria kalkhawm ten ram economy \han theihnan a ngaihdan te thawh a sawiho tura an kalkhawm chu lawmawm a tih thu sawiin, NEDP hnuaia Entrepreneurship tihhmasawnna kalpui mekah mi tumruh tlat, sawrkar tan thawhpui nuam tak an awm thu leh, chu chuan Mizoram economy-ah pawh zawi zawiin nghawng \ha a nei chhoh zel tur thu a sawi a. State economy pawh a ziaawm chhoh tak viau thu leh, tunah chuan Mizoram chu ei \awk \awk (subsistence economy) nilovin Market Economy a siam turin sawrkarin hma a lak mek thu a sawi a. Chumi tur chuan sawrkarin mi remhria leh taima te puih a remchanna siamsak lam a thawk ang a, mipui lamin eizawnna kawng \ha leh tluantling tur an ngaihtuah in an dap ve thung dawn a ni, a ti.
Mizoram Conclave hi chhawng thum a kalpui niin, hawnna inkhawm hi Technical Session pahnih in a chhawnzawm a. Dr. James LT. Thanga, MSPB Expert Member hovin Agriculture leh a kaihhnawih eizawnna kawngin Mizoram hmasawnna atan an thawh leh hmalak zel dan tur te ngaihthlak a sawiho a ni a. Dr. Laldinliana Varte, MEDMOC Expert Member hovin Entrepreneurship lama hmawsanna chungchang sawiho a ni bawk.

Latest News

NACO hotu ten Mizoram rawn tlawh mek

Chawlhkar khat chhunga Mizoram District pathum – Aizawl, Lunglei leh Kolasib District-te tlawh kual tura rawn zin National AIDS Control Or...