Aizawl-ah Chapchar Kut Ni 2 hmang dawn

Mizote Kut pawimawh leh la hman lar ber, Chapchar Kut chu kumin hian Aizawl-ah ni 2 hmang turin ruahmanna siam a ni.

Chapchar Kut Organising Committee hi nimin khan an Chairman, Chief Minister Lal Thanhawla hovin Chief Ministers Conference Hall-ah \hukhawmin kumin a Chapchar Kut hman dan tur an sawiho a. He \hutkhawm a tel te hian he Kut hmanna tur atana chanvo leh mawhphurhna semzaiin, hun hman dan tur kimchang duang turin Programme Sub-Committee chu Art and Culture Director kaihhruaina hnuaiah din a ni a. Kumin Chapchar Kut hi ni hnih (1st leh 2nd, March) chhung awh tura ruahman niin, a Ni hmasa zawkah hian Mizo infiamna lam hawi zawnga programme siam a ni anga, a Ni hnihna ah zai, rimawi leh hnam lam chi hrang hrang a tam thei ang ber telh nise tia rel a ni. Chapchar Kut chhung hian mipui zingah Mizo hnam ziarang pholang tam thei tur zawngin Hnam thuam inbel uar tura inhrilh nise tia rel a ni a. A remchan dan angin Kut chhim tur leh a lawmnaa tel ve turin Zohnahthlak, State dang leh ram pawn a chengte chu sawm nise tia rel a ni bawk.

Kumin hian Chapchar Kut hi Aizawl Sipai Lammual-ah hman leh tura ruahman a ni a. Kut Pa atan Myanmar Chin State Chief Minister, Salai Lian Luai chu sawm tum a ni a, Chapchar Kut Organising Committee Chairman, Chief Minister, Lal Thanhawla chu Kut Thlengtu tura ruat a ni.