Mizoram-ah HIV hrik pai 14,632 hmuhchhuah ni tawhin damdawi hman khawloh avanga kai thar an pung

Mizoram State AIDA Control Society (MSACS) chhinchhiahna hnuhnung ber, March 2017 thleng khan Mizoram-ah HIV positive 14,632 an awm tawh a, mipat hmeichhiatna hmanga kai an tam berin tunlai hian drugs hluar tharin District pahnih ah chuan mipat hmeichhiatna aiin damdawi hman khawloh avanga kai an tam zawk a ni.

Mizoram State AIDSs Control Society (MSACS) chhinchhiahna a\anga a lan danin Mizoram-a Integrated Counselling and Testing Centre (ICTC) ah hian kum 1990 a\ang March 2017 thleng khan mi 605,119 te Thisen test sak an ni tawh a. Heng zinga mi 14,632 chu HIV positive niin hei hi thisen enfiah a\anga za zelah 2.42 a ni a. HIV AIDS inkaichhawn chhan tam ber hi mipat hmeichhiatna hman a\angin a ni a, hei hi zaa 67 vel a ni a. Inchiuna hriau in hman\awm avanga kaiin an dawt leh a, hei hi zaa 25 vel niin nu a\anga naute in a kai hi zaa 3 vel a ni a, a bak zaa 2 vel hi kaina chhan tarlan a ni lo thung. Mizoram-a HIV positive te hian enkawlna an dawng zel a, ART la tura ruahhman mi 10,531 an awm a, la thar mi 7067 awmin la mek tawh mi 5027 an awm bawk. Mizoram-a HIV positive zingah hian kum 25-34 inkar an tam ber a, zaa 42.45 an ni a. Kum 35-49 inkarin an dawt a, zaa 26.98 a ni a. Kum 14 hnuai lam tlem berin zaa 3.64 a ni bawk.

MSACS Project Director Dr. Lalmal-sawmi Sailo chuan State AIDS Control Society chuan National AIDS Control programme angin NACO kaihhruaina zulzuiin hna an thawk tih a sawi a. Hetah hian HIV kai hlauhawm a awm mek ‘High Risk Group’  nasa taka thlurbing an ni a; nimahsela, Mizoram-ah ve thung chuan sex avanga a darh nasat avangin mi zawng zawngin do a tul niin a sawi bawk. 

Dr. Lalmalsawmi Sailo chuan HIV/AIDS chu Society pakhat emaw, pawl pakhatin emaw an do hneh theih a ni lo tih a sawi a. Sex avanga mipui mimira a darh bakah tun kum 2/3 kalta a\ang khan Mizoram-ah drug a lo luh nasat thu leh, heng drugs te hi a tlawm thu sawiin, HIV nasa taka a tihdarh mek thu leh District pahnih-ah phei chuan HIV kaichhawnna tam ber chu damdawi hman khawloh a nih tawh thu a sawi bawk.