MIMER din tura hmalakna ah tihfel ngai zinga zaa 99 vel tihfel a ni tawh

Falkawn-a State Referral Hospital hotuten Mizoram Institute of Medical Education and Research  (MIMER) din tura hmalakna ah thil tihfel ngai zinga zaa 99 vel zawhfel a ni tawh tih an sawi a. Medical Council of India hotuten lo endik pawh nise, an pawmpui theih tawh ngei an beisei tih an sawi.

Falkawn-a State Referral Hospital-a Medical College din tura Mizoram Sorkar hmalak dan hi nimin khan MPCC Media Cell leh Aizawl-a thuthar lakhawmtu \henkhatin a hmunah an enfiah a. State Referral Hospital Medical Superintendent, Dr. Lalhmuchhuaka chuan, Medical College din tura Mizoram Sorkar ruahmanna chu a hlawhtlin ngei theih nan theihtawp chhuaha hmalak mek a ni tih a sawi a. Mizoram-ah Sorkar laipui kaihhruaina hnuaiah zirna In hrang hrang RIPANS, Mizoram University, Vety College leh NIELIT Centre hlawhtling taka din a lo ni tawh a, heng zirna In-te hi din a nih a\anga reilote ah hmarchhak biala zirna In \ha berte zinga mi a ni chho vek thei nia sawiin, hetiang bawk hian Mizoram Institute of Medical Education and Research (MIMER) pawh hi hlawhtling taka din theih a beisei tih a sawi.

MIMER State Nodal Officer, State Referral Hospital-a Deputy Medical Superintendent nibawk Dr. Jane R. Ralte chuan State Referral Hospital hi kum 1996-a khatih laia Prime Minister Pu HD. Deve Gowda-an Mizoram a lo tlawh \uma Mizoram Sorkar-in a ngen anga din a ni a. Tunah hian khum 159 a awm mek a ni. Falkawn-a State Referral Hospital-ah hian Medical College din a nih theih nan Mizoram Sorkar chuan kawng hrang hrangin hma a lo la tawh \hin a, June ni 9, 2013 khan Medical College din tura inrawnkhawmna hmasa ber neih niin, hmalakna kal zelah College din tur hming atan Mizoram Institute of Medical Education and Research (MIMER) tih pawm a ni.

Medical College din tura Mizoram Sorkar hmalakna hi Sorkar laipui chuan January ni 2, 2014 khan a pawmpui a, hemi atan phalna chu February ni 19, 2014 khan khatih laia Union Health and Family Welfare Ministry-a Jt. Secretary, Dr. Vishwas Mehta-in Mizoram Sorkar a hriattir angin Sorkar laipui leh Mizoram Sorkar chuan Medical College dinna atan inremna chu May ni 16, 2014 khan an siam a. He inremna ang hian State Referral Hospital tihchangtlun nan cheng vbc. 189 ruahman niin, Mizoram Sorkar chuan 2016-17 khan NEDP hnuaiah damdawi In tihchangtlunna atan cheng vbc. 28 a dah bakah kum 2017-18 atan cheng vbc. 15 a dah bawk.

State Referral Hospital hotute chuan, Sorkar laipui a\anga Medical College din phalna hmuh ni tawh mah se, a taka tihhlawhtling tur chuan Medical Council of India phalna neih a ngai niin an sawi a. MCI-in inkaihhruaina dan a siam ang chuan Medical College behchhan tur damdawi In-a nitina inentir chu a tlem berah mi 400 an tlin a ngai a, Medical College din a nih a\anga kum 1 chhungin zirtirtu 104 an tlin a ngaih bakah kum 4-na a\angin mi 168 an tlin a ngai a, hnathawktu dang zawng zawng nena Staff mamawh zat chu a tlem berah mi 629 an tlin a ngai a, tunah hian Falkawn-a State Referral Hospital-ah hian hna-thawktu 235 awmin, chung zinga 39 chu Doctor niin, Staff Nurse 77 an awm a. MCI duh anga Medical College din tur chuan Staff Nurse hi mi 175 tal an tlin a ngaih avangin Sorkar-in hna thar 629 siam turin hma ala mek niin an sawi.

Zawhna chhangin Hospital hotute chuan, tun dinhmunah nitin OPD-a inentir chu mi 250 bawr vel an nih thu leh Department 10 hawn a nih tawh thu an sawi a. Medical College din phalna hi kum 2014 a\ang khan kum tin Medical Council of India-ah dil a ni a. Kum 2014 leh 2015-a dilna chu MCI hian a hnawl a, nikum khan dil nawn leh niin, hei hi pawm a nih hnuah kumin Jan. 5-6 khan an rawn endik a. Inentir zat an tam loh avangin phalna a pe thei rih lo a ni.