Latest News

District Hospital thar sak thuai kan va mamawh tawh em!

District Hospital thar sak thuai kan va mamawh tawh em!

- Kapliana Pachuau
Nimin (25th Oct. 2017) zingkar khan damlo tlawhin Serchhip Hospital-ah ka han kal a, Trauma Building chhung, Casualty pawn si a Stretcher-ah pa pakhat, damlo nat hmel tak mai hi thisen chaw khai chungin a lo mu a, mak ka ti hle mai a. Chutah X-Ray Room luh dawn \hutthleng sei-ah nu pakhat damlo, nat hmel ang reng mai a lo mu bam mai bawk a, damdawi In a awm an mamawh si a, an pahnih hian khum an chang lo a, zankhua in pawn khawvawtah damlo chung chungin an mu ta a nih hmel a, an lainatawm dun hle mai.
Tunhnaiah Serchhip JN Hospital in nasa takin \an an la thar a, Doctor leh Nurse Duty te pawhin \an an la nasa in an hah em em mai a, Serchhip mipui mai bakah kan chhehvel thingtlang khua a damlo; tunhma a Aizawl pan nghal mai \hin ten Serchhip Hospital hi belh tlak a ni tawh tih hria in an rawn bel nasa em em mai a, chumi in a kentel chu Khum indaihlohna a ni ta a ni.
Tun dinhmunah Serchhip Hospital hi khum 40 awm theihna chauh a ni si a, a tlem berah khum 100 awm theihna tur tala tihlen a hmanhmawh thlak ta hle mai.
Kum 2011 March thla khan Chief Minister, Lal Thanhawla’n Serchhip District Hospital thar sakna tur lungphum hi Serchhip Chanmari Vengthar daiah a rawn phum daih tawh a, Chief Minister meuhvin a lung phum mahse vawiin thlengin sak a la ni ta chuang lova. Tun dinhmunah phei chuan a sakna tur sum pawh la awm uk si lovin a hmunhma thu ah thuneitute leh khawtlang hruaitute thu a inhmulo leh ta zel a, a manganthlak takzet a ni.
Chief Minister in Serchhip District Hospital Building sakna tur kum 2011 a lung a lo phum tawh kha Central Sorkar lamin DPR (Detailed Project Report) an pawm lo nia sawi a ni a, vawi 2/3 Health Department Directorate lamin DPR an thehthlak leh hnu ah pawh a hlawhtlin thawm a la awm lo leh ta cheu ni awm a ni a. Chutihlaiin Health Department lam thuneitute chuan tuna Hospital Building awmna hmunah hian a chhawngin sak an duh nia sawi a ni a, chu chu Serchhip Joint Village Council ten an duh lova, Chanmari Vengthar dai lam, Chief Minister in lung a phumna ngeiah dah an duh zawk a, a manganthlak hle.
Engpawhnise, khawi hmunah pawh nise Serchhip District Hospital thar sak thuai thuai hi kan mamawh ber tawh niin a hriat a, a hmunhma thuhla ah ngaihdan inanglo pawh nise kan khawtlang hruaitute leh Hospital lam thuneitute hian DISTRICT HOSPITAL thar sak thuai a nih theihnan hma han la rum rum tawh se kan va duh tawh em! 
Kan khawtlang hruaitu, VC leh Ruling Party hruaitute pawh “District Hospital thar sak thuai a nih theihnan Aizawl-ah Chief Minister an hmu, Health Minister an nawr, Health Department Directorate an luhchilh...” tih thu te hi tualchhung chanchinbu a chhiar mipuiin kan chakna a rei tawh! |an han la tak tak teh u. In hnungah Serchhip mipui kan awm e...

Comments

Popular News (Last 30 Days)