Aizawl-ah'Sankalp Parv' hmang

Nimin khan Aizawl-a Lal Thanhawla Auditorium-ah India Independence Day 2017 lawmna kalzel puala buatsaih, Kum 2022 lo thlen hma a, 'India thar' siam tura khua leh tui te inhlan thar leh intiam thar lehna ni, 'Sankalp Parv' chu Mizoram Larsap, Lt. Gen. (Rtd) Nirbhay Sharma leh Mizoram Chief Minister, Lal Than-hawla te uapna hnuaiah hlawhtling taka hman a ni.

'Sankalp Parv' ah hian Larsap, Lt. Gen. (Rtd) Nirhbay Sharma chuan mitin hian zalenna hlut zia kan hriathiam a pawimawh thu sawiin, chumi hrethiam tura Sankalp Parv, Festival of Resolve buatsaih a ni chu hmalakna pawimawh tak a nih thu a sawi a. New India siam tur chuan mitin kan \anrual a ngai tih sawiin, Mizoram-ah chuan khawtlang an inlungrualin, tlawmngai pawl ten ram hmasawn nan nasa takin hma an la , tha pawh an thawh a. Mizoram-ah Chi leh chi inthliarna awm ve lo chu ramdangte tana entawn tlak a nih thu a sawi.

Chief Minister, Lal Thanhawla pawhin Indenpendence Day lawmna hmang \angkai a, ram mipui te hmasawnna atan leh insiam\hatna tura zirtirna remchang tak, Sankalp Parv, Prime Minister, Narendra Modi-a’n a duangchhuak chu thil awmze nei tak a ni tih a sawi a. Kum 2022 thlen hma a 'India Thar' siamna tura rampum huapa tih hlawhtlin tur hmachhawp pasarih zinga engemaw zat chu vanneihthlak takin Mizoram-ah tih hlawhtlin a ni tawh a; a lawmawm in a chhuanawm hle tih a sawi bawk.

Sankalp Parv, New India Movement 2017-2022 a intiamkamna ah hian thu 7-ah intiamna neih a ni a, heng zingah hian Kum 2022 ral hma a India ram - Ramfai, Rethei awmlohna, Eiruk leh hlemhletna awmlohna, Firfiaka chet leh pawisawilo chunga thahrum thawh awm lohna, hnam leh sakhua na avanga inenhranna leh innghaisakna awmlohna bakah chi leh chi thila inthliarna awmlohna hmuna siam a ni.