Latest News

Serchhip-ah Parking Fee khawn tan a ni; College Peng-ah Tender chhangtu awmlo thung

Nimin a\ang khan Serchhip khawpui chhunga Parking Area ruahman hrang hrangah Parking Fee khawn a ni ta.
State Transport Authority (STA) in ruahmanna a siam angin nimin, Sept. 15, 2017 a\ang khan Serchhip khawpui chhunga Parking Area siam hrang hrangah Parking Fee khawn a ni ta a, Serchhip District Transport Officer, B. Lalrinsanga hnena a\anga thu kan dawn danin Mizoram a District \henkhat ah chuan Parking Fee hi khawn ni tawhin Serchhip-ah pawh lirthei dah dan te khuahkhirh a \ul ve tawh avangin Parking Fee hi khawn a ni a, Parking Fee khawnna tur hian Parking Area panga (5) siam niin Tender chhuah a nih hnuah Parking Area pali (4) chu chhangtu awmin chhangtu awmlohna area pakhat a awm a, chhangtu awmna Parking Area pali-ah hian Fee hi nimin khan khawn \an a ni ta a ni.
Serchhip khawpui chhunga Parking Fee khawnna atan hian Area No. 1, AOC Veng-a Education Complex leh PWD Peng inkar chu C. Biakremmawii chuan changin Area No. 2, PWD peng leh Police Beat inkar leh Area No. 3, Police Beat a\anga Tuikhuah Veng, Tipper Stand thleng chu C. Hmangaihzuala chuan a chang thung a, Area No. 4, IOC Veng leh PWD IB Peng inkar chu Lalchhuanawmi chuan a chang thung a, Area No. 5, College peng chu chhangtu awm lovin la Tender \hat leh tur a nih thu DTO chuan a sawi.
Parking Area hrang hrangah hian lirthei neitute chuan lirthei an dahin an dah a\anga darkar khat chhungin Two Wheeler-ah Rs. 5/- zel, Taxi-ah Rs. 8/- leh LMV, MMV leh HMV-ah Rs. 10/- zel chawi a ngai dawn a, dah rei dan a zirin darkar khat hnuah Parking Fee hi a pung zel dawn a, Lirthei pakhat hi nikhatah a dahna hmun pangngai ah darkar 10 chin bak dah phal a ni lova, chutiang aia rei dah ngai, thil \ul bik a awm chuan thuneitute phalna neih a ngai \hin dawn a ni. Three Wheeler leh LMV Public Service, sorkar in stand a pekte chu an Stand ah nikhat atan Three Wheeler in Rs. 5/- Leh LMV in Rs. 10/- an pe \hin anga. Hei hi anmahni Stand-a an dinna atan chuah niin Parking Area danga an dinna ah erawh chuan Parking Fee pangngai, a chung ami ang khi an chawi a ngai dawn a, amaherawh chu hei hian a huam chin erawh hriatchian theih ala ni lo thung a, sumdawnna atana hman lirthei zinga Stand pek, Private Motor hunna hmuna dah ve te chungchang hi ngaihtuah thar ala \ul dawn nia thudawn a ni.
DTO chuan tuna Parking Fee khawn a nih hnuah hian a \ul dan angin Garrage neilo te chungchang ah te pawh hmalak zel a nih dawn thu a sawi a, Parking Fee khawn chungchanga hriatthiam loh nei te chuan DTO Office-ah zawhfiah theih reng a nih thu a sawi bawk.

Comments

Popular News (Last 30 Days)