Mizoram-a khawpui fai thlanna neih tur atana Serchhip khawpui inbuatsaih dan tur sawihona nei

Mizoram sorkar in Mizoram-a khawpui hrang hrangte faina kawnga inelna a buatsaih tura Serchhip khawpui chhunga hmalak dan tur sawihona chu nimin khan Serchhip District Bawrhsap kaihhruaina hnuaia sorkar Department hrang hrang, tlawmngai pawl leh khawtlang hruaitu ten an sawiho.

He sawihona Serchhip DC’s Conference Hall-a neih ah hian Bawrhsap, Sangchhin Chinzah chuan Urban Development & Poverty Alleviation Department buatsaiha District khawpui tan faina lama intihsiakna leh khawpui dangte tana intihsiaknate buatsaih anih thu sawiin, chu intihsiaknaa dinhmun \ha taka Serchhip a din theih nana ruahmanna neih puiah kalkhawmte a sawm a. District Capital fai ber kan nih theihna atana hmalakna tur pawimawh leh inbuatsaihna tur chi tinrengah kalkhawmte chu ngaihdan nei pha chin annih beisei vanga sawm khawm an nih thu hrilhin, hmalakna tur chhawpchhuah zawng zawngte a taka puitlin ngei tura thawhpuiah Serchhip mipuite a sawm nghal a. Ram lailia awm kan nih avangin kawng engkima entawn tlak nih kan tum tur a ni, a ti. Bawrhsap chuan, intihsiakna lawmman dawn ngawr ngawr aia fai vanga mihringin lawmman hlu chi tinreng a hmuh theihte rilrua dah lian chunga ruahmanna te nei turin kalkhawmte sawm a, khawpui chhunga Village Council leh tlawmngai pawl te chu anmahni huamchhung \heuh te uluk leh ngun zawka faina kawnga vil turin a chah bawk.

He hunah hian SDO (Sadar), R. Vanrengpuia chuan inelna neih dan tur sawiin kalkhawmte hian UD&PA in khawpui fai a tehna tur chi hrang hrangte sawi zuina leh hmalak dan tur rawtna an siam nghal a, sawihona neih a nih hnua hmalak dan tur an duan zingah School hrang hranga Eco Culb te chu \angkai zawkin faina kawnga hmalakna ah hian hman nise, VC tinin Sanitation Committee an neih te chu hmang \angkaiin nasa zawka hmalak nise, VC leh YMA ten anmahni huamchhung \heuh ah khawtlang huap hnatlang neiin hma la se, khawpui chhungah Bawlhhlawh bawm tam zawk hung turin VC tin ten anmahni remchan ang \heuhin hma la lo se, Sorkar Pisa tin ten anmahni Office \heuh tihfai hna thawk se, VC tin ten an huamchhunga Kohhran Biak In tinah faina chungchanga mipuite hriat tur thu chhiarchhuah tur sem se, kawngpui kam-a ran In awm te senghawi turin VC tin ten anmahni huamchhung \heuh ah hma la se an ti a. Ran khuahkhirh chungchangah tuna VC te hmalak mekna bakah bawhzui ngai a awm a nih chuan DC hovin Police leh thuneitu dang ten sawihoin a \ul anga hmalak nise an tih bakah Road Protection Squad awm tawh sa chu a \ul anga tharthawh leh nise an ti bawk.

Urban Development & Poverty Alleviation Department hian District Capital faina lama intihsiakna atan hian tehna pawimawh chi 6 (ruk) a siam a. Chungte chu: Open Defecation Free (ODF) Mark 30, Bawlhhlawh sawngbawl dan (Solid Waste management) Mark 20, Information, Education & Communication (IEC) Mark 10, Mipui tha thawh (Community Participation) Mark 15, Tui chhe luankawr (side drain) Mark 15 leh Mipuite lungawina (Public Feedback) Mark 10 pu te an ni a, heng point hrang hrangte khian chipchiar lehzuala intihsiakna kalphung dang an la nei leh hlawm bawk. He intihsiakna endik hna hi September ni 1 a\anga ni 20 inkarah hian Evaluation Team ten an nei kual dawn a. Hei bakah hian District Hqrs. nilo, khawpui (Urban area) dangte tan pawh inelna hi a hrana buatsaih tur niin SDO (Civil) kaihhruaina hnuaiah hmalak dan tur rel a ni dawn bawk a ni.

District Capital fai intihsiaknaah hian lawmman pakhatna in Rs. 1,00,000 (nuai khat), pahnihna in Rs. 50,000 (singnga) leh pathumna in Rs. 30,000 (sing thum) leh Citation te an keng tel dawn a, October thla ah result puan a ni ang.