Latest News

July 1, 2017 a\anga hman tur Chhiah lak dan thar, GST chungchang zirhona Serchhip-ah neih a ni

Thla thar July 1, 2017 a\anga rampuma Chhiah lak dan tur thar hman tur, Goods & Services Tax (GST) chungchang zirhona chu nimin khan Taxation Department Serchhip Zone hnuaia sumdawngte tan buatsaih a ni a. He hun hi Taxation Department-a Joint Commissioner, Kailiana Ralte chuan a rawn hmanpui a ni.

Taxation Department, Serchhip Zone hnuaia sumdawnna khawih hrang hrangte tana Goods & Services Tax (GST) chungchang zirhona Serchhip Hmar Veng YMA Hall-a neih ah hian Taxation Department Joint Commissioner, Kailiana Ralte chuan thla thar ni 1 a\anga GST hman tur chu India ramin zalenna a hmun hnua Chhiah lak dan chungchanga thil inthlak danglam lian ber a nih thu sawiin, ram in zalenna a hmuh a\angin Sales Tax hmangin kum 2005-ah VAT hman leh a nih thu a sawi a. Amaherawh chu heng te hi \hat tawklohna tam tak a awm avangin sorkar hmasa a\angin GST hi ruahmanna siam a nih thu a sawi a, tunah chuan July ni 1, 2017 a\anga hmang turin ruahmanna engkim siam a nih tawh thu leh he Dan hmang tur hian ram Danpui pawh siam\hat a nih tawh thu a sawi a. GST chu khawvel ram tam zawkin an hman tawh thu a sawi bawk.
Taxation Department Joint Commissioner chuan tunhma lam chuan Chhiah lak danah hian Bungrua a\anga Chhiah lak (Goods Tax) chu Taxation Department in lain Services Tax chu Central Excise in an lak thu a sawi a, tuna GST Dan hman a nih dawn takah chuan heng Chhiah te hi a hlawma kalin chan an insem tawh dawn tih a sawi a. Sumdawnna cheng nuai 150 chin hnuailam ah Central in zaa 10 changin State in zaa 90 a chan tur thu leh cheng nuai 150 chin chunglam ah chuan za zela 50 ve ve-a insem tur a nih thu a sawi a bawk.
Kailiana Ralte chuan tuna an kal mek danah chuan thil siamchhuak tu ten an thilsiam ah Chhiah chawiin sumdawng ten an lakchhawnna ah Chhiah chi hrang hrang an chawi zui zel avangin Mizoram ang ah phei chuan bungraw man hi a to phah \hin hle tih a sawi a, amaherawh chu GST hman a nih hnuah chuan heng Chhiah chi hrang hrang an lak \hin te hi a tira pek a nih dawn avangin thil man pawh tlawm ngei tura ngaih a nih thu a sawi bawk. Taxation Department in Tax chi hrang hrang an lak- Entry Tax te, VAT, Entertainment Tax leh Tax dang te leh Central in Tax a lak \hin chi 9 vel te chu GST hnuaiah hian dah vek a nih dawn thu pawh sawiin, ram pakhat a cheng ten Chhiah chikhat kan chawi chu a tum ber a nih thu a sawi bawk.
Nimin a Goods & Services Tax (GST) chungchang zirhona neih ah hian HK. Lal-hawngliana, Asst. Commissioner leh Lal\hachianga, Asst. Commissioner ten kalkhawmte zirtirna an pe a, he huna zirtirna petute chuan GST hmang tur hian India Danpui siam\hat vawi 101-na ah Article 246A chu a thara siamin he Dan hi hman theih tura siam a nih thu an sawi a, he Dan hi July 1, 2017 a\anga hman \an tur a nih thu leh he Dan thar hnuaiah hian sumdawng, bungraw zuartu leh Services (Eg. Restaurant, Hotel, Private Hospital/Clinic, Private Educational Institution leh a dangte) hnuaia kum khata cheng nuai sawm leh a chunglam leichhuak te leh State pawh a\anga hralh tur bungraw laluttu te chu inziahluh a ngaih thu an sawi a.
GST chu chi thum ah \hen a nih thu pawh sawiin, Integrated Goods and Services Tax (IGST), Central Goods and Services Tax (CGST) leh State Goods and Services Tax (SGST) te a nih thu pawh sawiin, GST-ah hian Tax rate chi 4- 5%, 12%, 18% leh 28% siam a nih thu an sawi a, sumdawngte tana Chhiah pe tura inziahluh dan te leh Chhiah pek dan tur hrang hrangte chu he huna kalkhawmte hi an zirtir a. Tuna GST Awareness Campaign an buatsaih chu a tawpna tur a nih loh thu leh a taka hman a nih hunah pawh harsatna ala awm dawn avangin inzirtirna hi la neih zel a nih tur thu te an sawi bawk.

Comments

Popular News (Last 30 Days)