UD&PA Minister in a hmuna hnathawh a en hma chuan Sports Stadium sak hna thawktute chawl rih turin ngen

Sub-Hqrs. YMA Serchhip chuan Serchhip Hmar Veng-a Sports Stadium sak hna thawh mek ah ruahman lawk ang ni lova hnathawh a awm nia hriain UD&PA Minister chu a hmuna enfiah tura ngen nise an ti a. A hmuna enfiah a nih hma hi chuan hnathawh kallai pawh lo chhunzawm tawhlo turin hnathawktute chu an ngen bawk.

Sub-Hqrs. YMA Serchhip hian nimin tlai khan an President, R. Sanghmingthanga kaihhruaiin Sub-Hqrs. YMA Office-ah Emergency Meeting neiin Inrinni kaltaa Sub-Hqrs. YMA Vigilance & Monitoring Committee in Serchhip Hmar Veng-a Sports Stadium sak hna kal mek a hmuna an tlawh report ngaihthlak a ni a. He hunah hian Vigilance & Monitoring Committee hruaitute chuan Sports Stadium-a Artificial Turf phahna tura a hnuai bera lung phah chu ruahman lawk aia lian tam tak a awm thu te, heng lung te chil muk a nih dan chu an duhkhawploh thu te, Hnathawh a muang lutuk leh hmanraw lakkhawm a muang lutuk nia an hriat thu te, Stadium-a tui paihna a mumal tawklo nia an hriat thu te, Synthetic Fibre Tract lane a tira awm tura ruahman paih leh a ni te, Pavillion-a \hutna dah chu a zing lutuk leh tei vel harsa khawp nia an hriat thu te leh Department a\anga hnathawh viltu an awm mumalloh thu te tarlan a ni a.

Heng te hi member te chuan an sawiho hnuah helai hmuna hnathawh kal mek te chu a hmuna en turin UD&PA Minister chu sawm nise, hnathawh \ha tawklo leh a nih tur ang ni phakloa an hriat te chu sawipui nise an ti a, Minister hian a hmuna a rawn tlawh hma chuan hnathawh kal mek te pawh lo chawlh-san lailawk rih turin hnathawktute chu an ngen nghal bawk a ni.

Sub-Hqrs. YMA Serchhip hian an huam-chhunga hmasawnna hnathawh hrang hrang enpui a, vil a, \ha taka thawh a nih theih nana hmala turin Vigilance & Monitoring Committee a din a, an hmalakna hi Mizoram Chief Minister leh Serchhip Bialtu MLA ni bawk, Lal Thanhawla leh UD&PA Minister, Zodintluanga te pawhin \ha an tih thu leh chhunzawm zel tura an duh thu Sub-Hqrs. YMA Serchhip hruaitute hi hmai-chhanah an lo hrilh tawh nghe nghe a ni.