MNF Party in CBI koluh sak tura ngenna CM-ah an thlen

MNF Party chuan nimin khan Mizo Carbon leh Lottery chungchanga thil dik lo tam tak awm te CBI chhui tir tura ngenna Chief Minister hnenah an thlen.

Hemi chungchanga MNF Party in nimin a thuchhuah an siamah Chief Minister, Lal Thanhawla'n CBI leh ACB te chu Mizo Carbon leh Lottery chhui tir tura a inpeih thu an lo insawi bâ tawh nia sawiin, Chief Minister hnenah lehkha an thehluh ah hian, "May ni 12, 2017 (Zir-tawpni)-a Congress Bhavana Political Session-a i thusawite MPCC Media Department-a mi, Lalhruaitluanga Kawlni-in a rawn tarlanah khan i thusawi lawmawm tak mai kan lo hria a. Chutah chuan Zo Carbon leh Mizoram Lottery chung-chang thu-a mipui ten thu hriatchian an duhte chhui chhuak chiang turin ACB emaw, CBI emaw hman ngai a nih chuan rawn sawi sela hma ka lo la vat ang, i tih thu kan lo hria a. Hei hi lawmawm kan ti em em a. Heng thilte chhui chhuak chiang tur hian CBI ngeiin hma la se thain kan hria a.

"Chuvangin i Chief Secretary hnenah kan lehkha hi mi 'endorse' sak la. Ani'n Mizoram Sorkara thuneitu concern hnenah thu lo pein heng thilte chhui chiang turin CBI kohna lehkha lo siam sela. Tin, i thu sawi angin an kalpui ngei a ni tih kan lo hriat ve nan chung lehkha Copy te pawh chu min pe thei se kan lawm takzet ang," tiin, MNF General Secretary, Pu C. Lal-rammawia hmingin lehkha hi an thehlut a, he an lehkha thehluh ah hian tun thla ni 11-a MPCC Media Department in thuchhuah an siam pawh an thiltel nghal bawk a ni.

Nimin Chief Minister hnena MNF Party-in CBI ko lut tura ngenna lehkha an thehluh hian Chief Minister, Lal Thanhawla hi a awmloh avangin Deputy Secretary & PS to Chief Mi-nister, Alexander V. Chawngthu MCS hnenah an thehlut a. Chief Minister hi nimin khan Sainik School hawng turin Chhingchhip khua ah a kal thung a ni.