MLTP Act hman leh rawtna Resolution hnawl

Mizoram Legislative Assembly Budget Session nimin a chhunzawm-ah MNF Member, Lalrinawma resolution putluh, 'MLPC Act kan hman mek hian Kohhran, Khawtlang, chhungkua leh mimal ah harsatna leh buaina nasa tak min thlen avangin he dan hi titawpin MLTP Act kan hman \hin ang kha hman leh ni rawh se' tih chu sawiho anih hnuah hnawl a ni.

Resolution neitu, Lanrinawma'n a Resolution hi a sawihawn hnuah member te chuan an sawiho zui a, eptu lama thusawitute chuan zu chuan khawtlang, chhungkua leh mimal tinah harsatna a thlen nasa tih sawiin, zawrh phalna pekchhuah anih hnuah zu avanga thihna a tamin buaina chi hrang hrang a thleng nasa niin an sawi a. MLTP Act hman hnu a kum 11-na ah nghawng a neih hrang hrang zirturin Study Group siam a ni a, MLPC Act erawh hman a nih a\anga kum 1 velah zirchiangtu tur din a ni nghal chuan a nghawng a te lo hle tih a tichiang niin a sawi a ni.

Hetihlai hian rorellai aiawha thusawitute chuan zu chu thil \halo ani tih hriatsa nimahse, khapna hnuaiah pawh a tam reng tho avangin dan anga zawrh mai chu enchhinna anga kalpui a ni, an ti a, tunah hian Sorkar chuan a zirchiangtu tur Committee te dinin uluk takin zu zawrhna dan hmanlaiin a nghawngte an zirchiang chho mek a, zirchianna zawhfel anih hnuah a \ul anih chuan Sorkar chuan zu zawrhna dan hman lai chu hlih a hreh dawn lo a, zirchianna neih mek chu nghah rih mai a \ha zawk a ni an ti thung a, hetianga sawihona neih anih hnu chuan House chuan he resolution hi bukin a hnawl ta a ni.

He Resolution sawihona ah hian Excise and Narcotics Department changtu Home Minister, R. Lalzirliana chuan Zu Zawrh phalna neia zuar mek Mizoram-ah mi 98 an awm mek a, chung zinga dawr hawng thei mi 91 awmin, hawng lo 7 an ni a, Bonded Warehouse 3 a awm mek tih a sawi a. Total Prohibition hlih hnuah control chunga khapna dan hman mek ah Zu peg 2 a\anga peg 3 in phalna a ni a, ruih phal a ni lo, a ti a, dan \ha tak awm mahse zawm famkim theih loh a ni, a ti.

MLPC (Act) hnuaiah Zu avanga Police thi an tam tih sawi \hin a nih chungchangah Home Minister chuan MLTP Act) hlih a nih hma pawhin Zu avangin 60 a\anga 100 kumtinin an thi tih a sawi a. MLTP Act chu mirethei tan dan chhe tak nia a ngaih thu leh MLPC Act chu Legislation hmanga hman a ni a, Private Member Resolution a\angin a ti theih loh avangin la ngaihtuah chhoh zel a ni dawn tih a sawi a ni. Zirchiangtu tur siam a ni tawh a, an zirchiang hnu ah sorkarin ngun takin a thlir dawn a, ram leh hnam tana \ha ber tur a nih chuan hnuhkir leh pawh tlawm a an ngaih loh thu a sawi bawk.