Latest News

Zo hnahthlak te insuihkhawm leh inpumkhatna atan sorkar ang pawha hmalak mek a ni - Lal Thanhawla

 Chief Minister, Lal Thanhawla chuan Zo hnahthlak hnam hrang hrang te insuihkhawmna leh inpumkhatna atan Sorkar ang pawha theihtawp chhuaha hma lak mek a nih thu sawiin, Pathian in rem a tih hunah rorelna pakhat hnuaia kan awm ngei a beisei thu leh a rin thu a sawi bawk.

Zo Reunification Organization (ZoRO) General Headquarters in Chin Lushai Conference January ni 29, 1892-a Fort William a neih champhaphak vawi 125 denchhena inpumkhatna leh insuihkhawmna atana ni 3 awh programme, Diakkawn YMA Conference Hall a an buatsaih nikhatna, nimin a Khuallian nia hmanpuiin he thu hi Chief Minister, Lal Thanhawla chuan a sawi a, Chief Minister chuan Zohnahthlak te chu tunah rih chuan sorkar pathum hnuaiah awm mah ila thisen zawm kan nihna leh chhulkhatkual kan nihna hi a bo dawn chuang lo tih sawiin, “Pathian in rem a tih hunah rorelna pakhat hnuaia kan awm ngei ka beiseiin ka ring a, mahse he hun hi beiseina nung nen kan nghah a ngai a ni,” a ti a. Zofate inpumkhatna atan leh khawvel huapa pawl lian ber UNO thleng hiala Zofate chanchin leh rorelna pakhat hnuaia Zofate kan awm theih nana ZoRO in theihtawp chhuaha hma an lak tawhna leh hma an lak mek te chu lawmawm a tih thu sawiin, an hnathawh chu ropui a tih thu a sawi bawk.
Mizoram pawna awm Zo hnahthlak ten Mizo-ram hi Zofate Jerusalem ah an ngaih leh an pawm thu sawiin, “Kan tling emaw kan tling lo emaw, nu leh pa chan chan hi kan mawhphurhna \heuh a ni a, Mizorama cheng ten hetiang zawnga kan ngaihtuaha hma kan lak tlan a ngai a. Mizoram Sorkar chauh hi Zo hnahthlak te Sorkar awmchhun a tih theih a, chuvangin nu leh pa tling kan nih theih nan kawng engkimah Mizoram-a cheng te hi  entawntlaka kan awm leh kan nun a ngai,” a ti a. Mizoram chhunga Zo hnahthlak \awng kan hman chauh hi Zo hnahthlak \awng a ni lo tih pawh sawiin, Mizoram pawna Zo hnahtlak te \awng hman hi Zo hnahthlak \awng vek a ni tih hi kan pawm a ngaih thu leh \awngkam thlahdah chin loh a \hat thu a sawi bawk.
Chief Minister chuan inpumkhatna leh insuihkhawmna atana hmalakna leh ke penna te chu fimkhur a ngaih thu sawiin, kihhnawk awm lova hmalak kan thiam a \ul thu a sawi a, ‘Hnung lama Mit nei te kan veng a ngai a, mahse rilru khata kan awm a kan inpumkhatna ti chak zawnga ke kan pen zel chuan kan tum ram hi kan thlen ka beisei tlat a ni,” a ti a. “Kan tumah kan chian chuan tuman min dal thei lova, a tam thei ang berin he thil hi kan rilru leh kan thinglunga kan vei a, hma kan lak chuan engtikah emaw chuan rorelna pakhat hnuaia kan awm ka ring tlat a ni,” a ti bawk.
ZoRO hruaitute hian Chief Minister, Lal Thanhawla’n Zofate inpumkhatna atana hna a thawh chu ropui tiin he hunah hian chawimawiin ngaihhruina an hlan a. He hunah hian Chief Minister nupui, Lal Riliani chuan ZoRO in Central YMA, MZP, MSU leh Zofa Global Network (ZGN) ten inpumkhatna atana hma an lakna te chawimawina thuziak an buatsaih chu a hlan a ni.
February ni 2 thleng a awh tur Chin Lushai Conference champhaphak lawmna nimin a neih \an hi C. Chawngkunga, Consultant, ZoRO  chuan kaihruaiin Chin Lushai Conference chungchang leh Kumpinu in Zo hnahthlak te a \hendarh dan chanchin te a sawi a. He hunah thusawitu dang Central YMA President, Lalbiakzuala chuan inpumkhatna leh insuihkhawmna chu YMA ngaih pawimawh ber a nih thu sawiin, hemi kawngah hian YMA chuan ke pen in hma a la zel dawn tih a sawi bawk.
He hunah hian ZoRo Gen. Hqrs. hruaitu President, R. Sangkawia leh midangte pawhin thusawina hun an nei bawk a, Vawiin ah chhun-zawmin mi pawimawh hrang hrang ten he hun hi an hmanpui dawn a ni.

Comments

Popular News (Last 30 Days)