LE&IT Minister leh MYC Chairman te’n tihsual an neihloh avangin an bang dawnlo - Chief Minister

Chief Minister, Lal Thanhawla chuan Kolkata-a Nalanda Institute of Advance Studies (NIAS)-a zirlai 32thawn an nih chungchangah LE&IT Minister, Lalrinmawia Ralte leh Mizoram Youth Commission Chiarman, T. Sangkunga te chu engmah tihsual an neih loh avangin an bang dawn lo tih a sawi.

Mizoram Pradesh Congress Committee (MPCC) in nimin a Aizawl-a Congress Bhavan Golden Hall-a Political Session an neih ah Chief Minister leh MPCC President ni bawk, Lal Thanhawla chuan tunhnaia MNF Party in Labour, Employment & Industrial Training Department Minister, Lalrinmawia Ralte leh Mizoram Youth Commission Chairman, T. Sangkunga te bang tura an tih chungchang hi sawiin, an pahnih hi an bang dawnlo tih a sawi a, “Tihsual engmah an neih loh avangin an bang dawn lova, engang pawhin min nawr mahse Chief Minister ka nih chhung chuan an bang lovang,” a ti a. MNF Party-in hemi kaihhnawiha a tisualtu lo zawk hrem a ni anga an sawi chungchang chu chhangin, ‘Sorkar laia Aii Puk thubuaiah khan tunge an hrem?’ tak tih leh ‘Contract hna a\anga zaa 3 an lak, an party Treasurer hnena thleng ta lo-ah khan a mawhphurtu an hrem em?’ tih chu a zawt tih a sawi a. Lal Thanhawla chuan, MNF Sorkar laia MYC Chairman an dah chuan \halai pakhat mah a thawn chhuak lo nia sawiin, sum \hahnem tak hmang siin, sawisel tur emaw sawisel loh tur emaw pawh hna a thawk lo hrim hrim niin a sawi a. Sorkar hmalakna sawisel a, Total Band leh kawngzawh huaihawt \hinte chu eptu pawl an nih vang mai mai niin a sawi bawk.

SSA hnuaia zirtirtute hlawh chungchang a sawinaah Chief Minister chuan heng zirtirtute hlawh hi Mizoram sorkar bat ni lovin Central sorkar bat zawk a nih thu a sawi a. Central sorkarin sum an rawn pek theih loh avanga zirtirtute pawh hlawh pek theih an nih loh thu sawiin, “Kan Mi-nister zahawm tak leh kan Parliamentary Sec-retary zahawm tak te’n Central sorkar an zu nawr avangin tunah hian hlawh hi pek an ni dawn ta a. Central sorkar hian an hlawh tur hi rawn pe thuai \hin se kan buai kan buai lovang,” a ti a. Eptu pawlte chu SSA-a thawkte an lainat tak tak a nih chuan Central-a an thurualpuite hnenah enga tinge an sawipui mai loh tih a zawt bawk.

Aizawl Upper Khatla-a Bible House bawr vel kawng tlahniam chu Sorkarin pawi a tih thu pawh sawiin Chief Minister chuan, hei hian sorkar lu pawh a tihai hle tih a sawi a. A tuartu lamte leh Sorkar hotu lam pawh an inbiak tawh thu sawiin, inchhawmdawl dan ngaihtuah mek a nih thu a sawi a. Tunhnaiah Railways lam hotu te’n an hmuh thu pawh sawiin, Sairang a\anga chhimlam pana relkawng a kal zel dan turte sawiin, Kawrpuichhuah leh Lawngtlai lama rel kawng kalna tur survey chu tun |hal chhung hian an zo hman dawn nge hriat a nilo na a, chak taka hmalak zel a nih thu a sawi bawk.

Nimin a Political Session an neih ah hian  Home Minister, R. Lalzirliana pawhin thusawiin NLUP chu lo tawp dawn pawh nise tuna la tur la awm, 3rd & 4th Phase amite chu pek vek tur an ni tih a sawi a. Heng mite \anpuina pek dan tur pawh \umkhatah nge \umhniha pek zawh tur tih chu ngaihtuah mek a nih thu sawiin, “NEDP hi kalpui a ni chho dawn a, mahse NLUP hi mamawh an la tam tih Sorkarin a hria a, chuvangin tunah hian MLA bial tinah NLUP dawng tur mithar 36 thlanchhuah leh tur a ni,” a ti bawk.

He hunah hian School Education changtu Minister, H. Rohluna pawhin tunhnaia SSA-a thawk te hlawh tur chungchanga Central Sorkar an zu dawr dante sawiin, duh anga sum a tam loh avangin State dangte pawhin an lo bawhzui nasa niin a sawi a. “Lehkha mai bakah keimahni ngei zu kalin zu bawhzui lo ta ila, pawisa kan chang lo mai ang tih pawh a hlauhawm a ni,” tiin an ngenna te Central Minister leh Officialte’n an lo tih hlawhtlin sak avanga an lawm thu a sawi bawk.