Tuipui ‘D’ Lei dawhlai chim ah mi 1 boral. Lei dawh siam\ha leh turin PWD in hma la nghal.

Inrinni kalta (Dec. 13, 2014) chhun dar 12:15 vel khan Lunglei District-a Tuipui Darzo kai lei dawh mek chu a chim a, lei hian mi 10 chim hnanin hliam an tuar a, hliam zinga pakhat chu damdawi In panpui a nih laiin a boral bawk. 

Thudawn danin he Lei dawh hna hi thawh mek niin Inrinni chhun khan anchor Block (a banpui) a lei tlangpui thirzai lian kilhbehna chu pit in a lei dawh lai hi a chim a, Lei dawh chim lai hi chhun thingpui an in dawn lai a ni a, hnathawk \henkhat chuan thingpui in turin lei hi an kalsan hman tawh a, hnathawk laklawh lai mi 10 chu lei hian a chim hnan a ni. He vanduaina thlenga hliam zinga mi Fateh Mohammed (52), Matia Buru, Kolkata Garden Rich chu Hnahthial damdawi In panpui a nih laiin a boral a, pakhat chu First Aid pek hnuah chhuahtir a ni a; na zual deuh 3 chu Aizawl Civil Hospital panpuiin midang 2 chu Lunglei Civil Hospital panpui an nih bakah midang 3 chu Hnahthial Hospital-ah enkawl an ni bawk. Lei hi dawh zawh \ep tawh niin thingzai pawh mihring kalkai theih chuan phah vek tawh a ni a. Thingzai 100 vel chiah kilhbeh hmabak an nei tawh a ni. He Lei dawhtu contractor hi Guha and Niyogi Associate, Kolkata a ni a, Nov. 19, 2012 a\anga hna thawk \anin thla 12 chhunga zo hman tura ruahman a ni a. Mahse an hna hi a huna an zawh hman loh avangin a zawh hun tur hi vawi thum pawhsei sak an ni a. Senso atana sum ruahman chu Rs. 252,75,000 niin heta \ang hian Rs. 212,17,000 pekchhuah ni tawhin tun thla ni 20-a zawh hman tuma hmalak lai mek a ni.
    Nimin khan sorkar chuan thuchhuah siamin he Lei chim chhan hi chiang taka sawi mai theih a ni hrih lo nia sawiin, Lei khaitu thirhrui lian, a sir tawna 4 ve ve, khawmual lama thlun nghehna (Anchor) khawthlang lam a mi zawk a inbat, a hmawr thleh hnua chep/clip nghet tur chu, lei level siam dik tura la siamrem (adjust) leh ngai anih avangin a nih dan tur angin an la kilh nghet tawk lo nia a lan thu leh hei vang hian lei dawh mek chungah pawh mi tam tak awm phal a ni lo reng tih an tarlang bawk. He vanduaina thlenna hmun hi bialtu MLA, Pu John Siamkunga leh PWD thuneitute chuan an thlen nghal thu a tarlang bawk a. He thil thleng hi vanduaithlak a tih thu leh sorkar chuan pawi a ti takzet tih sawiin, “A chhiat dan nghun taka enfiahin Public Works Department chuan a dawh \hat leh dan tur ruahmanin hmaa la thuai dawn a ni,” a ti bawk.