Bairabi leh Sairang inkar Rel kawng lian chi siamna turin PM in lungphum a phum.

Bairabi leh Sairang inkar Rel kawng lian chi siamna tur lungphum chu Inrinni, Nov. 29, 2014 zan khan Prime Minister, Narendra Modi chuan phumin cheng vbc. 2000 chuang senga hna thawh a ni ang.

Bairabi leh Sairang inkar Rel kawng lian chi siamna tur lungphum phumna inkhawm hi Inrinni zan khan Guwahati Maligaon Railway Stadium-ah neih a ni a, he Rel kawng siam hna hi North East Frontier Railway hnuaia thawh tur niin he Rel kawng siam tur hi KM 50.5 a thui a ni dawn a, Bairabi leh Sairang inkarah hian Rel Station pathum Hortoki, Kawnpui leh Mualkhang-ah te dah a ni ang a, he Rel kawng siamna atan hian cheng vbc. 2384.34 seng tura ruahman a ni. He Rel kawng siam turah hian khualzin phur Rel te chu darkar khatah KM 100 a chakin a tlan thei anga, bungraw phur chi Rel te chu darkar khata KM 65-a chak in a tlan thei thung ang. He Rel kawng siam turah hian Lei lian siam tur (Major Bridges) 42 a awm dawn a, Lei te deuh (Minor Bridges) pawh 154 siam a ni dawn bawk a ni. Lei sei ber tur hi 1042.44 metres a ni anga. ROB 6 awmin, RUB hi 7 a awm bawk dawn a ni. Hengte bakah hian leiverh 23 siam a ni dawn bawk a, leiverh sei ber hi 1733 metres a sei a ni ang a, lei verh zawng zawng sei zawng hi meter 9092 a thui a ni ang.
    Lungphum phumna inkhawm ah hian Mizoram Chief Minister, Pu Lal Thanhawla chuan hetianga Bairabi a\anga Sairang thleng rel kawng Broad Guage a siam tur lungphum phum a ni ta chu Mizoram tan hmasawnna rahbi pawimawh tak a ni, a ti a. Sairang chu Aizawl khawpui dai maia awm a nih avangin Rel kawng hi siam zawh a nih hunah chuan Mizoram leh India ram hmundang te chu awlsam takin a inkalpawh zung zung theih tawh dawn a, hei hian kawng tinrengin hmasawnna a thlen dawn a ni, a ti, Chief Minister leh Prime Minister te hi nimin zing khan Assam Administrative Staff College-ah an inkawm bawk a ni.