Pawikhawihtu chhuichhuah awlsamna turin pawikhawihna hmun venhim lamah \an lak \ul ti.

Kumin chhungin Serchhip Police Station-ah Case chi hrang hrang 57 ziahluh a ni tawh a, Police te chuan pawikhawihna a thlenin hnu chhui a awlsam theihna turin sulhnu awm te venhim a pawimawh thu an sawi bawk.

Serchhip Police Station-a Office In-Charge, Pu H. Biakchhuma chuan nimin Oct. 23, 2014 khan a Office-a tualchhunga thuthar thehdarhtute lengah sawmin pawikhawihna a thlena pawikhawihtu awlsam zawka chhuichhuah a nih theih dan tur chungchang a sawipui a. Kumin January thla a\anga nimin thleng khan Serchhip Police Station-ah hian thubuai 57 lai ziahluh ni tawhin heng zingah hian rukru case tam berin case 23 ziahluh a ni a, In rawk case 10, Motor accident \um 4, mi In-a buaina siam case 4, pawngsual case 3 leh tualthah case 2 te chu thubuai ziahluh zinga tam deuh te an ni. He hunah hian Police thuneitute chuan Mizote chu in\anpui leh inpuibawm \hin Hnam kan ni tih sawiin, amaherawh chu hetianga kan inpuihbawm hian pawikhawihna thlengah pawikhawihtu chhuichhuahna ah harsatna a thlen phah \hin tih an sawi a. Pawikhawihna alo thlen in mihring nunna chhan chu thil pawimawh hmasa ber a ni tih sawiin, amaherawh chu mihring nunna chhan theih tawhloh thil ah chuan pawikhawihtu chhui-chhuah an nih theih nan pawikhawihna thlenna hmunhma vel zawng zawng chu enfiah a pawimawh avangin thil ho te nia kan ngaih thlengin khawih danglam lova thuneitu ten an enfiah theih tura kan lo venhim a pawimawh tih an sawi.
    Hei bakah hian Police thuneitute chuan pawikhawihna a thlenlohna turin mipui lam pawhin tihtur hrang hrang an nei tih sawiin, a bikin zan lama pawn-a eng chhit chu thil pawi-mawh tak a ni tih an sawi a. Kan hma lawka hunpui lo thleng tur atan kawng hrang hranga an inbuatsaih chhoh mek thu sawiin, tlawmngai pawl te nen kumdang ang bawka thawhhona \ha tak an neih leh an beisei thu leh tun a\anga anni lam pawhin ruahmanna an siam an beisei thu a sawi bawk. Serchhip Police Station-a thawktute chuan tunah hian SI 4, ASI 1, Holder 4 leh Constable 18 vel chauh an awm tih sawiin, hei vang hian harsatna an tawk tih an sawi a, lirthei pawh duh anga hman tur an neihloh avangin harsatna an tawk \hin tih an sawi bawk. Nimin a inkawmhona hunah hian Serchhip SDPO, Pu Lalchhuanawma Chhangte leh 2nd OC, Pu Robert L. Hnamte te pawh an tel bawk a ni.