AMC Licensing Regulation 2012 chungchangah NGO ten an dinna ala danglamlo tih an sawi.

Mizoram-a tlawmngai pawl hrang hrangte chuan AMC Licensing Regulation, 2012 chungchangah an dinna ala ngai reng tih sawiin, an ngenna te tih hlawhtlin a nih loh chuan Sept. 1, 2014 a\angin AMC Office kai turte an dan tur thu an sawi bawk.

Mizoram-a tlawmngai pawl hrang hrang NGO-Co-Ordination Committee ten AMC Licensing Regulation, 2012 chungchanga rawtna an neih te chungchang sawiho tur hian AMC Executive Councillor te chu an Chairman thar, Pu Zarzoliana hovin nimin, Aug. 19, 2014 khan Central YMA Office-ah lengin NGO Co-Orination Committee leh Mizoram Merchants Association (MIMA) hruaitute nen an inkawm a. He hunah hian Pu Zarzoliana chuan “AMC Licensing Regulation-ah hian a taka ram leh hnam hmangaiha thawkchhuaka, ram leh hnam himna tura ngaihtuahna sengtu leh tawn hriat ngah zawk NGO te ngaihdan hi he hnam tan hian a him zawk ang tih hriain tuna AMC thar hi chuan NGO te duh dana kal a tum tih hi kan thutlukna a ni,” a ti a. He hunah hian AMC aiawhte chuan rawtna siamin NGO te thilphut zinga Mizo Tribal Certificate thil tel aiah Branch YMA Recommendation (NOC) leh ILP (2 years valid) neih zawk nise an ti bawk a ni.
    Hetianga inkawmhona an neih zawh hnu hian NGO Co-ordination Committee chu nimin vek khan Central YMA Office-ah hian \hukhawm nghalin AMC hruaitu ten rawtna an siam chu zahawm hle mah se ram leh hnam him nan chuan Mizo Tribal Certificate, Mizoram Permanent Residential Certificate leh Mizoram Photo ID phut tel ngei turin an rel nawn leh a. AMC Licensing Regulation 2012 chung-changah hian an dinna ala ngai reng tih sawiin, an thilphut hi tih hlawhtlin a nih loh chuan Sept. 1 a\anga AMC Pisa kai tur tiamchin awm lova dan an lo tum tawh pawh kaltlang pui ngei nise an ti bawk a ni.