Mizoram-a Zu khap burna Dan thlahdul tumna Mizoram Synod in duh lovin hma la mek.

Mizoram Synod chuan Mizoram-a Zu khap burna Dan siam\hat tum chu duh lovin zu khapna Dan thlahdul a nih lohna turin hmalak an tum a, nimin khan Mizoram-a tlawmngai pawl hrang hrangte kawmin he an hmalakna turah hian thawhho pui atan an sawm bawk.

Mizoram Synod hian nimin July 1, 2014 chawhma dar 10:00 khan Emergency Meeting neiin Mizoram sorkar in Mizoram-a zu khap burna dan hmanlai, MLTP Act chu thlahdul a Zu khuahkhirhna Dan thar siama Zu zawrh phal a tumna chungchang hi an sawiho a. SEC \hukhawm chuan tun Pathianni lo awm tur July 6, 2014 zan ah Mizoram-a zu khap burna dan thlahdul a nih loh nan Biak In hrang hrangah \awngtai rual programme siamin thuchah chhiar chhuah tur siam nise a ti a. Mizoram Chief Minister leh Minister bakah MLA zawng zawng hnenah he Bill hi pawm lo tura ngenna thlen nise tiin heng bakah hian Zu khap burna thlahdul duhlohna Poster tar nise tiin, tlawmngai pawlte nen an inlungrual theih chuan zu khap burna dan thlahdul duhlohna kawngzawh neih nise an ti bawk.
    Hetianga SEC \hukhawm in an rel hnu nimin tlai dar 3:00 khan Mizoram Synod hian Mizoram-a tlawmngai pawl YMA, MHIP leh MUP aiawhte chu Aizawl-a Synod Committee Room-a leng-ah sawmin SEC in Poster tar leh kawngzawh hi an duh leh duhloh an rawn a, he huna tel tlawmngai pawl te chuan inrawnkhawm phawt an mamawh thu sawiin, Vawiin tlai dar 5:00 hian an Meeting leh dawn nia thudawn a ni. Synod hmalakna chungchangah hian Synod Sr. Executive Secretary, Rev Lalzuithanga chuan Poster tar chungchangah YMA, MUP leh MHIP te hian an hming telh an duh loh pawhin Synod chuan poster tar chu an titlang dawn tho a, Inrinni vela tar hman turin ruahmanna siam tum a ni, a ti a. Kawng-zawh erawh chu tlawmngai pawl dangten an duh lo anih chuan Synod hming ang chuan an kaltlangpui loh tur thu a sawi bawk. Hetihlai hian Mizoram Kohhran Hruaitu Committee (MKHC) chuan hemi chungchang hi ngaihtuahna an la neilo thung a, Kohhran hruaitu \henkhat khat a\ang erawh chuan he thilah hian hmala tura thurawn erawh an dawng tawh tih an Gen. Secretary chuan a sawi bawk.