Mizoram Presbyterian Kohhran in MLA te Zu khuahkhirhna Dan thar thlawplo turin an ngen.

Mizoram Presbyterian Kohhran puipate chuan Zu khap burna dan hlipa a khuahkhirhna dan thar hman Sorkar in a tum chu thlawp lo turin MLA zawng zawngte an ngen tih an sawi.

Synod Puipate, Officers Meeting hotute chuan nimin July 7, 2014 khan Aizawl-ah chanchinbumite kawmin Zu chungchanga Presbyterian Kohhran dinna an sawifiah a. He hunah hian Synod Sr. Executive Secretary Rev. Lalzuithanga chuan Sorkarin dan thar hman a tum, The Mizoram Liqour (Prohibition and Control Bill) 2014 chu Assembly Session ah puhtluh a nih pawhin thlawplo turin Chief Minister leh Council of Ministers te bakah MLA zawng zawng ngenna an pe tih a sawi a, Bible tih danglam a nih ngawt loh chuan Presbyterian Kohhran chuan Zu thlah zalen-a zawrh emaw In phal emaw chu a remti thei dawnlo tih a sawi a, Zu khapna Dan, MLTP Act 1995 kenkawh chu an Kohhran in an thlawp thu leh he Dan hi khauh lehzuala kengkawh turin roreltute chu an ngen tih an sawi bawk.
    Zawhna chhangin Rev. Lalzuithanga chuan Zu khuahkhirhna dan thar hi Sorkarin a kaltlangpui a nih chuan Synod thuneitu sang Executive Committee in hmalak zel dan tur chu a la ngaihtuah tur a ni ang, a ti a. Synod Puipate chuan Sorkarin zu khap burna dan hlipa, zu khuahkhirhna dan thar hman a tum thu sawi a nih a\angin Thingtlang hmun hrang hrangah te zu zuar an pung nghal nia an hriat thu leh zu in \hinte pawh an huangtau nghal nia an hriat thu an sawi a, tuna Mizo khawtlang nun thlirin, Zu zawrh phalna pekchhuah chu khawtlang nun tichhetu tur nia an ngaih thu an sawi bawk.