Mizoram-ah Pseudo-Ephedrine (khehpuam) cheng vbc. 44 chuang hu zet man a ni tawh.

Mizoram Excise & Narcotics Department chuan Pseudo-Ephedrine tablet 598,69,632 man tawhin hei hi tualchhung rate in cheng vbc. 44 chuang hu niin Methamphetamine engemaw zat man a ni tawh bawk.

Hemi chungchanga Excise & Narcotics Department-a Public Relations Officer thuchhuah tarlan danin tunlaia damdawi hlauhawm tak, Methamphetamine siamna atana hman Ephedrine Quintal 2.84 chu Sept. 22, 1999 khan an man tawh thu leh kum 2011 a\angin Pseudo-Ephedrine pawh Mizoram Excise & Narcotics Department ten an man \an thu tarlangin, heng te hi Aizawl, Champhai leh Kolasib District-ah te man an ni ber tih a tarlang a. Tun thlengin Pseudo-Ephedrine hi mum 598,69,632 man tawhin hei hi tualchhung rate in Rs. 44,90,22,240.00 man a nih thu leh Pseudo-ephedrine kaihhnawih ah thubuai 38 ziaklutin mihring 69 man an ni tawh thu tarlang a. Heng zinga 15 chu Myanmar lam mi niin midang 15 dang chu Mizoram State pawn mi (Non-Mizo) an nih thu a tarlang bawk. Hei bakah hian Pseudo-Ephedrin a\anga siam Methamphetamine chu a vawikhatna atan Dec. 13, 2001 khan mum 670 man a nih thu leh kum 2011-ah man lehin tun thlengin Methamphetamine kaihhnawih ah thubuai 6 ziaklutin mi 9 manin, an zinga 8 chu Myanmar lam mi niin mi 1 chu Mizoram mi a nih thu a tarlang bawk.
    He thuchhuah a tarlan anih danin India ram chhunga ruihhlo (drugs) khapna leh khuahkhirhna atana Dan a hman ber, The Narcotics Drugs & Psychotropic Substances Act, 1985 (NDPS Act) chu Mizoram-a Nodal Department turin Excise & Narcotics Department chu 22nd June 1992 khan puan a nih thu leh Police Department leh khawtlang leh tlawmngai pawl te nen thawhhona \ha tak an neih avangin Mizoram-a ruihhlo khuahkhirhna kawngah chak taka hmalak a nih thu a tarlang a. Tunhnaiah tunhma lama damdawi hmansual \hin aia mihring tikhawlo nasa thei zawk, Methamphetamine lo chhuakin kan hmachhawn dawn mek tih tarlangin, he damdawi hi ngaihthah chi a nih loh thu leh chhungtin lo inveng lawka khawtlang leh tlawmngai pawlte pawhin mutmawh hnar-mawhah neih a \ul ta nia a lan thu a tarlang a. Hetianga ruihhlo tawlh hria an awm chuan District tina an Department Office hriattir turin an ngen nghal bawk.