Lok Sabha inthlanpui neih tur kal zelah Tripura Tuikuk Camp-ah vote thlak \an a ni.

Lok Sabha inthlanpui neih tur atan Tripura Transit Camp-a Tuikuk raltlan te chuan nimin April 1, 2014 khan vote an thlak \an ta a, hei hi duh lovin NGO hrang hrangte chuan lungawilohna an lantir zui bawk a ni. Mizoram-a Lok Sabha inthlanpui neih tur atan Tripura Bru Camp 6-ah ni 3 awh tur vote thlak chu nimin zing dar 7:00 a\ang khan neih \an a ni a, Election Commission in ruahmanna a siam angin Tripura sorkar chuan inthlan hi a buaipui a, Mizoram a\angin inthlan thlithlai tur hian mi 7 tirh an ni. Tripura Bru Camp-ah hian Postal Ballot-a vote thlakna tur hmun 6-ah siam a ni a, ni 3 chhung vote thlak tura ruahman a nih avangin vote tla zat hriat theih a la ni lova, nimin khan vote thlakna hmun hi Tripura Chief Electoral Officer Ashutosh Jindal-a pawh in a tlawh a ni. Tripura Bru camp-ah hian vote nei 11,179 an awm a, he thu buatsaih lai thleng hian Camp hrang hrangah harsatna a thlen hriat a nilo a ni.
    Hetianga Tripura Transit Camp hrang hrang-Naisingpara, Ashapara, Hezacherra, Kaskau, Khakchangpara leh Hamsapara-a vote thlak a ni hi duh lovin tlawmngai pawl hrang hrangte chuan nimin April 1, 2014 a\ang khan Chief Election Officer (CEO) Office-ah Puandum an zar a. He lungawiloh lantirna hi Tripura a Tuikuk awm te'n vote an thlak chhung neih tura ruahman niin April 3, 2014 tlai dar 5:00-ah lakthlak tur a ni ang. Central YMA President Lalbiak-zuala chuan vote hi thlak mahse, Tuikuk Camp hrang hrang a vote tla te hi chhiar loh theih dan a awm a nih chuan, chhiar a nih lohna turin Mizorama NGO Coordination Committee chuan hma an la dawn tih a sawi bawk.