District 5-ah Polling Party te chhuak mumal theilo

Mizoram-a tlawmngai pawl hrang hrang 5-YMA, MHIP, MUP, MZP leh MSU ten nimin April 7 a\anga dar-kar 72 awh tur Total Bandh an huaihawt chu Aizawl, Lunglei, Mamit, Kolasib, Champhai leh Serchhip-ah te pawh kalpui a ni a, hei vang hian inthlanna a duty tur Polling Party te pawh an chhuak mumal theilo a ni.

Aizawl-ah chuan Total Bandh neih a nih avang hian High School Field a\anga Polling Party chhuak turte dang turin Zarkawt leh Chanmari-ah duty indah a ni a, hei vang hian he thu buat-saih lai thleng hian inthlanna buaipui tura Polling party chhuak an awmlo nia thudawn a ni. Kolasib-ah chuan nimin khan Polling Station 9, Saiphai, Saipum, North Hlimen, Thingthelh, North Chaltlang, South Chhimluang, Bukpui, Thinglian leh Zodin-a duty tur Polling Party te chu EVM la chhuak tura DC Office an panna kawng ah dan beh vek an ni a, hetih rual hian Securitu a chhuak tur te pawh DC Office tual ah an awm khawm a, Polling party te an thlen theih loh avangin an chhuak thei bik lo a ni.
          Mamit District chhung Polling Station 27 a duty tur Polling party te chu nimin zing 9:30 khan chhuak \anin  Polling Station 27 a duty tur, Motor te 22 leh Bus 2-a thawkchhuakte chu an kir leh vek a, SDO (Sadar) Pu T. Vanlalmalsawmsanga chuan Polling Party te chu tlang tir mai turin ngen mahse, Bandh duty te hian an remtiloin hun rei vaklo chu an innawr deuh nia thudawn a ni. Lunglei-ah chuan Pathianni khan Tho-rang bial chhunga Polling Party 16 te chuan Lunglei an lo chhuahsan tawh a, nimin lamah erawh Polling Party hi chhuak zui awm lovin Total Bandh buatsaihtute chuan YMA Branch hrang hrang te chu Polling Party te chhuahna hmun tur Lunglawn mualah chhun zan zawm a Duty turin ruahmanna an siam a. Polling party kalkhawm \henkhat te pawh chhuah mai theih a nih loh a vangin haw tir leh an ni. Serchhip-ah chuan nimin khan Polling party chhuak tur an awmloh avangin harsatna lian lutuk thleng a awm lova, amaherawh chu nimin chawhnu lam khan inthlanna a duty tur Motor te chu DC Office-ah in report tura koh an ni nia sawi a awm avangin DC Office panna kawngpui ah Total Bandh a duty mi \ha-hnem tak an pungkhawm a, amaherawh lirthei dan tur hi chhuak an awmloh avangin harsatna leh buaina thleng a awmlo thung a ni.

     Hetihlai hian Mizoram chhimlama Lawngtlai leh Saiha District-ah chuan Total Bandh kalpui a nih ve loh avangin Polling Party ten nimin khan an duty-na tur hmun an pan a, Lawngtlai-ah chuan nimin khan Polling Party 60 te chhuah tir niin Saiha District-ah chuan Saiha khawchhung Polling Station 20 leh Thingsen Polling Station tih loh Polling Station dang zawnga duty turte chuan nimin khan an duty-na tur hmun an pan a ni.