Aizawl-ah Museum Week 2014 hawnna neih a ni.

Khawvel puma Museum Week hman tur chu nimin khan Aizawl-ah pawh hman \an a ni a, Art & Culture Minister Pu R.Romawia chuan he Week hi a hawng a ni.

Mizoram State Museum, Art & Culture Department buatsaihin Museum Week hi ni 24 -28 Feb. 2014 chhunga hman tur a ni a, he Week puala inkhawm nimin a State Museum Library Room, Aizawl-a neih ah Pu R. Romawia chuan , “Museum hi hnam history a taka pholanna pawimawh tak a ni a, min thlahtu kan pi leh pute chanchin a taka min hmuh tir thei tu a ni,” a ti. Museum hlutna chang hre tura inzirtirna uar a \ul thu a sawiin, tun dinhmunah chuan Museum hmunhma te leh thil phochhuah ten duhthu a la sam tawkloh thu leh, Museum thuam \hat nan state sorkar chuan hma a lak zel thu a sawi a. Lemziak leh thlalak Mizo nun ziarang phochhuak theitu bakah Mizo pasal\ha te lim emaw lemziak dah tam ni se a duh thu a sawi bawk.
    Mizoram State Museum hi kum 1977-ah Education Department hnuaiah a lo piang a. Kum 1989-a Education Department chu Department pathum (i.e School Education, Higher & Technical leh Art & Culture Department)-a \hen a nih kha Art & Culture Department hnuaiah dahin tun thlengin ala awm a ni. Museum-ah hian Gallery paruk – Histor, Anthropology, Ethnology, Textile, Zoology leh Archeology te a awm a. Museum en man hi naupang tan Rs.5/- leh puitling tan Rs. 10/- niin, school naupang zirtirtu hova en te chu a man chanve a en tir theih a ni a. Puitling kum 65 chin chunglam te tan en man lak a ni lo. Museum-ah hian tun dinhmunah Museum objects chi hrang hrang 936 phochhuah mek niin, Reserve Collection Room-ah Museum objects 2768 dah\hat mek a ni bawk.