Tuikuk hel nia hriat te rukbo Mizo pahnih ten Mizoram Police te kut an thleng ta.

Nikum Nov. 23-a Tuikuk hel nia hriat ten an rukbo mi pathum zinga Mizo pahnih chu nimin khan a rubotute hian an chhuah nia thudawn niin nimin tlai khan Mamit thlenpui hman tura beisei an ni.

Kan thulakna in a tarlan danin nikum Nov. 23-a Tuikuk hel ten mi pathum an rukbo zinga pahnih, Sanglianthanga@Maliana s/o Pu VL Hmuaka, Mamit leh Lalzamliana@Zamtea s/o Buanga (L), Republic Aizawl/Kolasib te hi nimin chawhma dar 11:03 vel khan Santi Bahini ten Khawthlang tuipui kam, Silsuri an rawn thlenpui a, hetah hian Mizoram lam a\angin BSF, CID, Addl. SP, Pu HL. Thangzika team leh MSU hruaitu an President, Zodinpuia leh hruaitu dang ten an lo dawngsawng a, Silsuri a\ang hian West Phaileng lam an panpui nghal a ni a, nimin tlai thimhlim khan West Phaileng hi thleng hman tura beisei niin hetah hian an hriselna te endik sak an nih dawn bakah MZP Sub-Headquarters huaihawtin anmahni lo hmuahna hun buatsaih tum tum niin Central YMA hruaitute leh tlawmngai pawl dang hruaitu ten thusawina an nei dawn a, Vawiin hian Aizawl thlenpui hman beisei a ni. Hetihlai hian heng mi rubotu ten an rukbo zing ami hnamdang, Deep Mandal S/o Nikhil Mandal, West Bengal, Airtel-a hnathawk lai erawh chu chhuah a la ni velo thung a ni.
    Hemi chungchang hi Home Minister, Pu R. Lal-zirliana pawhin nimin khan sawiin hetianga Mizo pahnih te chhuah an ni chu lawmawm a tih thu leh Deep Mandal chhuah a ni velo erawh lawm a kimloh thu sawiin, chhan-chhuah a nih ve theih nan chawl mai lova theihtawpa hmalak zui a nih tur thu a sawi bawk.

            Mizoram-a tlawmngai pawl hrang hrang leh Mizoram Pradesh Congress Committee te chuan Tuikuk hel leh NLFT ten an mi rukbo an chhuah ta chu lawmawm an tih thu an sawi. Mizoram-a tlawmngai pawl hrang hrang-Central YMA, MUP, MHIP, MZP, MSU leh Mizoram Pradesh Congress Committee te hian nimin khan Secretariat Conference Room-ah Meeting neiin hetah hian Resolution siamin he thu hi an tarlang a, he an Resolution-ah hian ‘Tuikuk hel leh NLFT ten November 23, 2013-a an rukbote, Sanglianthanga S/o VL Hmuaka, Mamit Charkawn Veng leh Lalzamliana S/o Buanga(L), Kolasib te sorkar hmalakna chak tak avanga January 21, 2014-a chhuah zalen an lo ni ta hi vawiina kalkhawm CYMA, MUP, MHIP, MZP, MSU leh MPCC te chuan lawmawm kan ti tak meuh a; chutih laiin Deep Mondal S/o Nikhil Mondal chhuah ala ni ve rih lo erawh hriatthiam harsa kan ti a. A rang lama chhuah ve a nih thuai kan phutin, sorkar pawhin chak takin chhanchhuah hna thawk zui zel se kan ti,’ an ti a. ‘Mizo mipuite inlungrualna avang liau liau leh Mizoram Police, NGO leh sorkar hmalakna bakah kohhran mipuite \awng\aina zarah nunna em chan lova rukbote chhanchhuah an ni thei thin hi kalkhawmte chuan chhuanawm kan ti tak meuh a. Inrukbona harsatna kan tawh chang hian mipui leh mipui inkara inpuhmawh tawnna leh indemna ang chi hi thleng tawh lo se kan ti,’ an ti bawk.