Kawlphetha renchem dan chungchang zirhona nei.

Nimin khan Power & Electricity Department hnuaia chhimlam enkawltu Lunglei Power Circle (LPC) hnuaia Engineers-te chuan Tourist Lodge Conference Hall, Zotlang, Lunglei-ah a vawikhatna atan ‘Energy Accounting of Southern Mizoram’ chungchang an zirho.

He zirhona hmanpuitu P&E Engineer-in-Chief, Pu L.Pachuau chuan P&E hnathawk zawng zawngte chu uluk leh taima taka thawk zel tura chahin kawlphetha zawrhchhuah a\anga sum lo lut vawn fel (energy accounting) hi kan hna pawimawh tak pakhat a ni, a ti a. ‘Kum 1991-a India ram sum leh pai dinhmun a tlakchhiat (economic crisis) vakna chhan ber pawh a thlawna kawlphetha luangral hnem lutuk kha a ni a, chuvangin Electricity Act, 2003 hmangin Power Department hi sumdawng thei turin ‘corporation’ ah leh vek tura thupek a ni nghe nghe a. Department dangte ang lovin P&E Department chuan hlawk tumin thawk tur kan ni,’ a ti. LPC hian kawlphetha a dawn theih zat (receiving capacity) chu 20MW a nih laiin a pekchhuah zat (total demand) chu 15MW a tlin tawh thu SE(LPC) Er. R. Lalrema chuan sawiin, Lunglei District hmasawnna atana pawimawh em em kawlphetha-a hmasawnna hi sawihmaih chi a ni lo, a ti bawk. Tun dinhmunah hian Lunglei Power Circle chuan Division 3 neiin 11KV Feeder 44 a awm a. Heng enkawltu tur hian JE 20, SDO 9, EE 3 leh SE 1 an awm a ni. Lunglei Power Circle hian Khaw 341 leh Veng 36 a chawm a, a zavaiin Consumer 42,484 a chawm a ni. Energy Accounting training-ah hian Feeder enkawltu tur bik Manager ruat tur a nih thu leh chungte chuan thlatin Report felfai taka an ziah dan tur zirtir an ni a. Energy Accounting Report-ah hian thlatin kawlphetha dawn zat, hralhchhuah zat, bill zat, man khawn zat, hralhna rate bakah kawlphetha hlauh zat te ziahluh vek a ni dawn a ni.