MNF din champhaphak vawi 52-na lawmna Aizawl-a Mizo Hnam Run-ah neih a ni.

Mizo National Front (MNF) chuan nimin Oct. 22, 2013 khan an din champhaphak vawi 52-na an lawm a, Aizawl-a he Ni lawmna Mizo Hnam Run-a neih ah an Party President, Pu Zoramthanga chuan thuchah a sawi a ni.

MNF din champhaphak vawi 52-na puala inkhawm ah hian MNF President, Pu Zoramthanga chuan Pathian in Mizote chu he rama awm tur leh a malsawmna haichhuak turin a dah tih sawiin, “MNF leh India sorkar inremnaah pawh, kan hnam kan sakhua kan culture vawnhim sak tlat turin Constitution Article 371 (g)-na ah hei hi chiang takin a inziak,” a ti a, “Kan Sakhaw vawn sawi-nghing turin Congress kaihhruai sorkar laipui khan tihngaihna a hre lo va, nimahsela, an thiam fin vervekna hmangin, ‘Remna atan chauhva ding kan ni,’ an rawn ti a, “A tirah chuan \i dêkin, tawm-im takin an lo lut a, tunah chuan kan Mizo Nationalism inhumhimna leh kan Sakhaw inphenna Phaw thlengin min chhun pawp sak tawh a, Chal hnawih sen leh Coconut sawhkek te chu chapo takin mipui hmaah an sawi ngam tawh a ni,” a ti.
    MNF Sr. Vice President, Pu Tawnluia kaihhruai he hunah hian Pu Zoramthanga chuan Congress party chu hausa veng leh mi neinung awmna hmunah chuan hnâwl mek an nih thu sawiin, “Retheite retheihna remchangah hmangin, an pumpuiah an hnuk a, NLUP cheng Sing hnih khat hmangin, mi rethei ril\amte an sawp mek a, he an Thal-alh-thei ti mit tur hian, MNF a sorkar a ngai a, mipuite changkanga kan siam a pawimawh a, a thlawna sum sem laka kan fihlim theih nan, MNF chuan ram pum economy kan chawi sang dawn a ni,” a ti bawk. Hei bakah hian Pu Zoramthanga chuan sorkarna an siam hma MLA 14 an neih laiin MLA 5 in chhuah sanin MP inthlanah 3-na an nih bakah an party a phel bawk tih sawiin, “Khati khawpa kan chhiat lai khan kum 1998 a kan inthlan meuh chuan, PC nen \angdunin MLA 34 lai Pathian in min pe mai a, kan hma lawka kan inthlan turah pawh hian sorkarna siam tura MLA mamawh zat leh Voters-te chunga thuneitu Lalpa kan Pathian hian a ma rawngbawl turin, thuneihna kan kutah a dah ngei ang, tih hi ringhlel suh ang che u, kan mamawh tawh MLA min pe ang” a ti bawk.