Kum 8 chhungin Mizoram-ah Cancer vei thar 9,248 awmin Cancer vangin mi 4,622 an thi bawk.

Kum 8 kalta (2003-2010) chhung khan Mizoram-ah Cancer vei thar 9,248 hmuhchhuah a ni a, hemi kum chhung vek hian Cancer vangin 4,622 an thi bawk nia chhianchhiah a ni.

He thu hi Zirtawpni kalta a Aizawl-a I&PR Conference Hall-a 'Dissemination of Mizoram Cancer Statistics and Training on Cancer Registration Methodology' tih ah tarlan a ni a, he huna tarlan a nih dan chuan kum 8 kalta chhunga Cancer veithar hmuhchhuah 9,248 zinga 5,133 hi mipa niin a bak 4,115 te hi hmeichhia an ni a, Cancer vanga thi 4,622 zinga 2755 hi mipa niin 1867 chu hmeichhia an ni. Mizoram chu India ram pum ngaihtuahin chi 9-ah Cancer vei tamna ber dinhmun a hauh a, Mipa bikah chuan kum 2009-2010 chhung khan Pumpui cancer hmuhchhuah 324 awmin hei hi hmuhchhuah zawng zawng a\anga chhutin 23.5% a ni a, chaw dawt cancer-in dawtin 199 hmuh a ni a, chuap cancer-in a dawt leh a ni. Hmeichhia-ah chuan Chuap cancer hmuhchhuah an tam a, 187 hmuhchhuah niin hei hi hmuhchhuah zawng zawng zinga Za-a 16.9 a ni. Chuap cancer hi pumpui leh chhul hmawr cancer ten an dawt leh a ni. India ramah Mizoram chu cancer tamna a nih mai bakah Aizawl District chu a tamna ber a ni a, mi nuai khat zela 273.4% in cancer an vei anga chhut a ni. Cancer awmchhan ber chu zuk leh hmuam leh thil rep ei tam vang niin mithiamte chuan an sawi a ni.

Cancer chungchang sawihonaah hian Principal Director Health Department Dr. Lalrinliana Sailo chuan Mizorama Cancer natna a pung chho ta chu Department ang pawha theihtawp chhuaha a ven dan ngaihtuah a ngaih thu a sawi a, Sorkar hmalaknain tunah chuan Cancer enkawlna khawl \ha tak tak neih chhoh zel a ni a, an Department-ah cancer enkawlna kawngah hmasawnna nasa tak a thleng tih a sawi bawk. He hunah hian Health Director Pi K. Ropari pawhin Cancer natna chu rang taka hmuhchhuah a nih a, enkawl vat a nih chuan tih dam harsa a ni loh thu sawiin, amah ngei pawh chutiang harsatna lak ata dam ta a nih thu leh natna chi khat ve mai a nih a vangin hlauhna avanga chhiatpui tur a nilo tih a sawi bawk.