Nursing School sak hna chawl turin ti

Serchhip-a District Hospital, Nursing School Doners Association chuan Serchhip-a Nursing School leh Hostel sak hna thawh mek chu nimin khan chawlhsan turin Contractor te ngenin an hriattir.

Serchhip District Hospital, Nursing School Doners Association chuan khawtlang hmasawnna tura Serchhip District Hospital/Nursing School/Hostel kan neih theihna turin Lawibual ram, Tarpi ami chu mi engemaw zat in an donate thu leh ram neitute leh sorkar-a Health Minister/Director te nen inbiakremna angin sorkar hna nghet an demand thu sawiin, hei hi hmu mai tura an inngaih laiin tun thlengin hna nghet an la hmuh loh thu an sawi a. Chubakah ni 22nd June, 2013-a Bukpui P&E Rest House-a Chief Minister in an Block hruaitu hlui leh thar te hriat lai ngeia inthlan hma ngeia tihfel sak a intiamna chu Health Department Director Pu Lalrinliana Sailo in ni 13th September, 2013 khan ‘Chief Minister hian engmah intiamna ka neilo,’ tia a sawi thu sawiin, hei vang hian an mangang tak zet tih an sawi a. Hei vang hian sorkar lamin an intiamna anga a tih hlawhtlin sak emaw, Agreement ziaka fel taka an dah sak emaw a nih loh chuan an ram chhunga hnathawh hi lo chawlhsan tur leh hnathawktute pawh hawn tir turin Contractor te chu an ngenin an hriattir tih an sawi bawk.