Jail-a tang 3 tlanchhuak

AMC PHALNA LOVA IN SA ELECTRIC LEH TUI PEK LOH NISE AN TI
August ni 17, 2013:Aizawl Municipal Council session, nimin a neih chuan AMC phalna lo-a in sakte chu electric leh tui pek loh ni se, pek tawh pawh tihtawp ni se an ti.

Hemi chungchang resolution hi eptu hruaitu, Pu Biak Thansanga put luh a ni a, tlem siam thaa pawm a ni a, AMC Building Regulation dan zawm kim lova in sa, AMC-in No Objection Certificate a pek lohte chu electric leh tui connection pek loh ni se, pek tawhte pawh tihtawp ni se an ti a ni. Hemi bakah hian Pu Rosiamngheta put luh, Municipal danpui hi resource person atana mi thiam, Law degree nei sawmin zir ho rawtna pawh pass a ni a, zawhna leh chhanna hunah Pu PC Lalhmingthanga zawhna, Pu Lalthanliana’n a zawhsak, Finance Commission 13-na-in kum 2012-13 atana pawisa a pek, Basic Grant leh General Performance Grant hi sorkarin a hren khawtlai avangin sorkarin sum engzatnge a chawi tih chu, kum 2012-13 chhung hian sorkarin a pung a la pe lo a, kum 2011-12 chhung khan Rs.10,87,493 a chawi tia chhan a ni. Aizawla kawng thenkhat hming phuahtu Committee, Pi Hmingthanzami kaihhruaiin rawtna a siam 30 zinga 23 pawh AMC hian a pawm a, Executive Councillor, Pi Lalhuthangi rawtna, Aizawla Parking Area hmun li-ah lirthei dah a tlem avangin, AMC-in heng parking area atanga Parking Fee khawn atanga sum a hauh zat tihtlem rawtna pawh pawm a ni bawk. AMC chuan Zemabawka Municipal Market panna kawng atana mimal ram lei rawtna, Pu Zorazoliana put luh pawh a pawm a, AMC session hi Chairman, Pu CT Zakhuma’n a kaihruai a ni.