Mizoram-a cham mek Union Minister of Development of North Eastern Region (DoNER) Jyotiraditya M. Scindia chuan nimin tlai khan Lok Bhavan Durbar Hall-ah NGO hruaitu leh mi hriathlawh tak takte kawmin mi pawimawh tak takte nena hun hman ho a ni chu lawmawm a tih thu sawi a. Kalkhawmte chu an tawnhriat leh thiamnate hmang tangkaia Mizoram hmasawn nana theihtawp chhuah zel turin a chah a ni. Hei bakah hian DoNER Minister hian kalkhawmte hi an tawnhriatte zawtin hmasawn ngaihna lai leh tul nia an hriat hrang hrangte a sawipui a, thu pawimawh hrang hrang an sawiho a ni.
Finance Department (Fiscal Management Wing) chuan nimin tlai khan Finance Secretary, Ramchuana hovin IFMIS tihchangtlun nana module thar pahnih - Pension Module leh e-Voucher Module te chu hawn belhin Employee Module Version 2.0 (e-HRMS) an hawng nghal a. Khawvel changkang chho zelah Financial Management System chu a pawimawh chhoh zel a tur thu sawiin, e-Voucher Module chuan thla tina AG (Accountant General) Office-a accounts thehluh hun a tih hma a beisei thu a sawi a. Compilation-ah nasa takin hmasawnna a thlen tawh dawn avangin lawmawm a tih thu a sawi a bawk. Pension module chungchang pawh sawi zauvin, Manual-a Pension paper process a nih tawh dawn loh avangin pension a hun taka pekchhuah kawngah mipui tan a tangkai a rin thu a sawi bawk.
