Skill Training kharna leh Certificate hlanna hun buatsaih a ni
NMBA - Ruihhlo ngaite Pual Gospel Camping atanga ruihhlo bansantute puala Serchhip Deputy Commissioner Office leh Mizoram Building & Other Construction Workers Welfare Board (MBOCWWB), LESDE te tangkawpin an buatsaih 'Skill Development & Reintegration Training' kharna hi nimin khan Serchhip DC Pisapui Hall-ah neih niin he hunah hian Serchhip Bawrhsap Paul L. Khuma chuan NMBA Camping leh Training te hlawhtling taka neih a ni theih nana Serchhip mipuite tanrualna chu lawmawm a tih thu sawiin, niminpiah mai-a Chief Minister Lalduhoma hova thutkhawm an neih ah pawh ruihhlo bansantute chanchin lawmawm tak hi sawilan niin, Chief Minister ngei pawhin a lawmpui thu leh a tul dan azira CM Special Package/Handholding Support pek an nih tur thu a sawi thu a sawi a. Training chhuakte chu ruihhlo laka fihlim zel tur leh mi dangte tan pawha entawn tlak ni tura tan la zel tura fuihin, Certificate leh bultanna tura an mamawh hmanraw chi hrang hrangte a hlan nghal bawk a ni.
He Training kharna hun hi Serchhip Addl. DC Dorothy Muansangi chuan kaihruaiin Master Trainer Lalramsiama hnen atangin Training an kalpui dan tlangpui ngaihthlak niin he Training hi Oct. 21 atanga neiin a tirah mi 21 ten bul tanin a tawp thleng mi 17 an awm thu a tarlang a. Training a tel te hi Exam mumal tak buatsaih sak an nih thu leh an thiamna a zirin Grade hrang hrang pek an nih thu a sawi a. Training te aiawh thusawi ngaihthlak ni bawkin hetianga DC leh a thawhpui bakah khawtlang in hma an lak zui sak chu lawmawm an tih thu an sawi a. Sub-Hqrs. YMA Serchhip President PC. Vanlalluna pawhin thu sawiin, SDO (Sadar) Rebecca Laldinmawii Hrahsel chuan lawmthu a sawi bawk a ni.