MJA (SD) ten Khawzawl District leh Champhai-a kuthnathawktute hmalakna a hmunah an tlawh
Serchhip-a Agriculture Department tirh-a kal MJA (SD) member mi 7 te hian kar kalta Nilaini khan Serchhip chhuahsanin Khawzawl hi an pan a, Khawzawl-ah hian District Agriculture Officer (DAO), Lallawmzuali leh a thawhpui ten lo dawngsawngin a Office-ah an inkawm hmasa a, he hunah hian Khawzawl DAO chuan an hmalakna hrang hrang sawiin, loneitute chu ‘Lo Number’ pawt lova huan nghet neihtir tumin hma an la tih sawiin, hetiang hi an Bial chhungah pawh an awm tawh thu a sawi a. Loneitute chu an thlai duh chintirin, a Khawl lam Department in an ngaihtuah sak thu leh Department dang nen tangho in loneitute tan khawl ngaihtuah sak te pawh an nei tih a sawi a. Kumin-ah Nihawi atanga Tel siam an thawnchhuah thu leh kumin hian a aia tam zawk chingin hma an lak mek thu te pawh a sawi bawk a. Thlai chin kawnga Mizoram hriat lar Serchhip District in Khawzawl District-a an hmalakna te a hmuna an enpui chu lawmawm a tih thu a sawi bawk.
MJA (SD) Member te hian Nilaini chawhnu lam khan Tualpui khua tlawhin Tualpui khuaa Tung chinna hmun chu tlawhin hnathawh kaldan an enpui a, Tualpui VCP, C. Lalromawia leh Tung Farming Cooperative Society hruaitu ten lo dawngsawngin, kum 2025-a Lo an neih ah Agriculture Department ten Tung chin an duh leh duh loh zawtin, hemi atang hian Tung hi an chin thu an sawi a, tirah chhungkaw za chuangin chingin, chhungkaw pakhat tan kung 200 tal chin loh chuan awmzia a neih loh avangin chhungkaw pahnih inkawp-ah a nei tlem zawk te chu chhuakin a nei tam ten Tung hmun hi enkawl zuiin a chhuak zawk te hian Lo dang an neih leh tak thu an sawi a, tunah hian kumin-a ching thar ve te nen chhungkaw 99 velin Tung hi an chin mek thu sawiin, an Tung chinna hmun hi a ngheta ram pe lovin Huan atana an enkawl hawh a nih thu an sawi a. Sawrkar lam pawhin kawng hrang hranga a puih thu an sawi bawk a. Hemi rual hian Thingtlang Lo-a Nihawi chinna hmun pawh an tlawh nghal bawk.
Ningani khan MJA Member te hian Tualte khua tlawh lehin kumin-a RKVY hnuaia Mizo-ram-a Vaimim thar tam ber, Kawm nuai hnih chuang thartu leh nikum lama Buh Phur 1200 zet thartu Lalnunmawia Huan chu tlawhin a hnathawh dan te an thlirpui a. Hemi hnu hian Tualte khua in Tomato an chinna hmun leh Tomato kar-a Nihawi an chinna hmun te tlawhin an Tualte khuaa Tomato chingtu ten man man zawka an thlai thar te an hralh theihna tura ruahmanna an siam dan te an thlirpui nghal a ni.
Chawhnu lamah MJA Member te hian Champhai Tlangsam-a Winery tlawhin helai hmuna Grape an sawngbawl dan te an thlirho a, helai hmuna thawktute chuan kumin hian Grape rah quintal 1300 vel chu kg-ah Rs. 60/- a an lei thu sawiin, an Society Member te tharchhuah chu an lei zo nia an hriat thu an sawi a. An Grape tui sawr/um chu hralh chungchangah harsatna an neih loh thu te pawh an sawi bawk a. An Grape Wine te chu Mizoram pawn lamah an hralh loh thu leh Mizoram Baptist Kohhran nen inremna an nei angin Sacramental Wine chu a hrana an siam thu an sawi a. BCM bakah hian Kohhran thenkhat te pawhin Sacramen atan hian an Grape Wine chu an hman thu an sawi bawk a ni.
MJA Serchhip District Member te hian Zirtawpni zan khan Serchhip an rawn thleng a, Inrinni khan Executive Committee thutkhawm nei zui nghalin an zinna hi an thlirlet a, kuthna-thawkte hnathawhna tlawhna hun ruahman saktu Serchhip DAO, K. Laltlanmawia leh a thawhpui te chungah lawmthu an sawi bawk.

