Mizoram-ah In sak tanpuina PMAY-U dawng chhungkua 36,382 an awm tawh

Khawpuia cheng mi harsa chhungkua, kum khata an sum lakluh cheng nuai thum (3) aia tam lo, mahni puala chenna In nei lo, In sakna tur ram nei si ten mahni puala chenna In an neih ve theihna tura sawrkar laipui-a Ministry of Housing & Urban Affairs hnuaia tanpuina, Pradhan Mantri Awas Yojana - Urban (PMAY-U) hnuaiah Mizoram-ah tanpuina dawng chhungkaw 36,382 an awm mek a; heng zinga za zela 86.31 hian In an sa zo tawh.
Mizoram-a PMAY-U kalpuitu Urban Development & Poverty Alleviation Department hotute hnen atanga Akashvani News Aizawl thudawn danin, PMAY-U 1.0 hi Mizoram chhunga Census Town 23-ah kalpui a ni a, tanpuina dawngtu (Beneficiaries) 36,782 awm mekin, chung beneficiaries zingah chuan tun thleng hian chhungkaw 31,745 ten In an sa zo tawh a, tanpuina dawng zinga In sa zo tawhte hi za zela 86.31 an ni.

Hei bakah hian PMAY-U 2.0 pawh sawrkar laipui chuan kum 2024 September thla khan a kalpui tan a, Mizoram-ah pawh District khawpui 11 kalpui mekin PMAY-U 2.0 hnuaia Mizoram atanga Detailed Project Report 11 leh beneficiaries 1,552 chu sawrkar laipuiin a pawm tawh a. PMAY-U hnuaia Beneficiary Led Construction (BLC) Scheme-ah hian tanpuina cheng nuai 2.5 thleng pek tura ruahman a ni.

PMAY-U 2.0 hnuaia Insak tanpuina hi Unified Web Portal hmangin online a dil tur a ni a, dil thei te chu Chhungkua, In hrang chang tawh an ni tur a ni a; India khua leh tui dik tak an ni tur a ni. Kum khat chhungkaw sum lakluh belhkhawm cheng nuai thum (3) aia tam la lut lo an ni tur a ni a; In sakna tur ram (LSC/Pass) an nei tur a ni. Hei bakah hian kum 7 tal khawpuia cheng tawh a ni tur a ni a; Income Certificate felfai tak a nei tur a ni a, tanpuina diltute chu khawi hmunah mah In tha luah tlak nei lo an ni tur a ni a; Aadhaar Card leh Phone number link tur niin, Bank Passbook leh Aadhaar Card link tur a ni bawk.