Zu kaihhnawih a thi mi 325 chhinchhiah an awm
Mizoram sawrkar Excise & Narcotics Department chhinchhiah danin kum 2014 atanga kumin thlenga Zu vanga thite hi mipa 279 leh hmeichhia 46 an ni a, hemi hun chhung hian nikum kha Zu vanga thi tam ber kum niin mipa 81 leh hmeichhia 13, an vaiin mi 94 an thi a. Kum 2024 khan mi 66 an thi a, a hma kum 2023 khan mi 57 thiin kum 2017-ah mi 52 an thi bawk a. Kum 2019 atanga kum 2022 inkar chhung khan Zu vanga thi chhinchhiah an awm lo thung a ni.
Kum 2014 April leh kumin June ni 12 inkar chhunga Zu vanga thi hi Kolasib District-ah an tam ber a, mi 142 chhinchhiah a ni a, Champhai District-in dawtin mi 70 an thi nia chhinchhiah a ni bawk a, Serchhip District-ah mi 57 thiin Aizawl District-ah mi 33 an thi bawk a. Hemi hun chhung hian Hnahthial leh Saitual District-ah Zu vanga nunna chan chhinchhiah a awm lo thung a, Lawngtlai District-ah pahnih leh Siaha District-ah mi pakhat chhinchhiah an awm bawk.
Zu kaihhnawiha thi chhinchhiahte hi Zu chhia (spurious liquor) in vanga thi thut ni lovin, Zu kaihhnawih a thi niin Excise & Narcotics Department hotute chuan an sawi a. Aizawl khawpui chhehvela Zu tha lo zawrh nia sawite chu Department hotute hian a sample lain Laboratory-ah an lo endik tir tawh thin a. Zu tha lo, mihring in atana hrisel tawk lo a ni tih Laboratory-a endikna atangin lang mah se, thih thutna tur Zu chhia ang chi, Methyl Spirit lampang erawh hmuhchhuah a la ni lo nia thudawn a ni. Department hotute chuan an Sample lak hi phai lamah an thawn thin a, a kal chhung a rei avangin endik a nih meuh chuan a lo danglam hman tawh thin nia an rin thu an sawi bawk.