World Polio Day pualin ‘End Polio Now’ Awareness Car Rally neih a ni

October 24-a hman thin ‘World Polio Day’ pualin Rotary Club of Aizawl chuan Inrinni khan Zeng hri (Polio) laka invenna leh umbo a nih theihna tura inzirtirna atan ‘End Polio Now – Awareness Car Rally’ an buatsaih.
He Rally hi Rotary Club of Aizawl President, Zoe Lalriinpuii John chuan Rotary Club of Aizawl Office atangin a vailiam a, Rally-ah hian Rotary Club of Aizawl-a Member mi 15 telin Aizawl atanga Reiek panin kawng an zawh a ni. He Car Rally in a a tum ber chu Zeng hri natna hi inven theih a nih thu leh naupangte leh mi zawng zawngte damchhuahna atana Polio Vaccine pek pawimawhzia mipuite hriattir a ni a. Zeng hri natna hi ven a nih loh chuan kumkhua atan taksa hman theih lohna thlen thei natna a nih avangin, naupang zawng zawngte chu hunbi neiin vaccine pek an nih theih nan mitin in hma kan lak tlan a ngai hle tih an sawi a ni.

Rotary International chuan kum tam tak Zeng hri umbo tumin khawvel pum huapin hma a la a. ‘End Polio Now’ tih chu Rotary-in khawvel atanga he natna umbo a tumna kawngah a hman thin auhla (slogan) pawimawh tak a ni a. Rotary Club of Aizawl chuan he Car Rally hmang hian Zeng hri laka inven theihna chungchangah mipuite hriatna a tihpun beiseiin, Zeng hri paih bo tumnaah mi tinte thawhhona leh tanrualna an ngen bawk a ni.